Espoza PM Taur Remata Ona Ninia Viajem Moris iha Mundo Ne’e Featured

By Ekipa INDEPENDENTE Juñu 19, 2023 239
Espoza PM Taur Matan Ruak, Saudoza Isabel Ferreira. Foto: Dok/INDEPENDENTE. Espoza PM Taur Matan Ruak, Saudoza Isabel Ferreira. Foto: Dok/INDEPENDENTE.

DILI: Teki-teki lian iha minutu balun nia laran no lori novidades tristeza ne’ebé mai hafalun familia Ruak, kolega no entidades hotu.

Tan ne’e, Ekipa Mediku husi HNGV liu husi Doutor Jõao ofisialmente fó sai ona katak, iha tuku 20:48 oras Timor-Leste Espoza Primeiru Ministru Taur Matan Ruak, Isabel Ferreira hakotu ona nia peregrinasaun iha mundu ne’e, iha nia Rezidensia Metiaut Dili.

“Ami husi ekipa mediku HNGV, ne’ebé hetan fiar husi Óspital Nasional Gúido Valadares durante ne’e mai fó apoiu asistensia mediku ba sra Isabel da Costa Ferreira, hakarak informa ba ita hotu katak, Sra, Isabel da Costa Fererira hakotu ona iss iha oras 20:48,”dehan Doutor João, ne’ebé Online INDEPENDENTE sita iha pajina Ofisial Gabineti Primeiru Ministru Taur Matan Ruak.

Mediku ne’e informa, Espoza husi Xefe Governu ne’e, durante sofre moras kankru instestinu ho stadium terminal.

Entretantu, Saudoza Isabel Ferreira husik hela La’en Keben (PM Taur Matan Ruak), ho oan na’in tolu kompostu husi feto na’in rua no mane ida.

Biografia Badak Husi Saudoza Isabel Ferreira

Isabel da Costa Ferreira moris iha Same, munisipiu Manufahi, Timor Leste iha 15 Abril 1974, oan hosi Mateus Ferreira no Ana Flora de Jesus Ferreira, hosi munisípiu Manufahi.

Isabel da Costa Ferreira hahú nia eskola primária iha tinan 1980 no termina iha SMA I iha 1993. Iha 1998 konklui estudu lisensiatura Direitu iha Universidade Nasional Denpasar, Bali, Indonézia.

Isabel da Costa Ferreira inisia karreira profissionál sempre liga ho kestaun Direitus Humanus no sempre ativu halo denunsia kona-bá violasaun sira ne’ebé komete durante períudo okupasaun militár Indonézia.

Ho razaun ida ne’e mak iha tinan 1998 no 1999, assume funsaun hanesan Koordenadora Jeral Organizasaun Naun Governamentál (ONG) Kontras Timor-Timur no mós hanesan Diretora ba Komissaun Direitus Humanus Timor-Loro Sa’e (CDHTL), iha tinan 1999-2001.

Iha tinan 2001, eleita hanesan Membru Assembleia Konstituinte, hosi lista UDT, atu dedika aan, ba redasaun artigu sira Konstituisaun RDTL, sai referente kona-bá Direitus Humanus.

Iha faze Administrasaun Tranzitória hosi Nasaun Unidas no depois de Restaurasaun Independênsia, Isabel da Costa Ferreira sai hanesan responsável ba kargu lubuk ida kona-bá apoiu umanitáriu, direitus humanos no polítikus, nomeadamente hanesan Vise-presidente bá Cruz Vermelha Timor-Leste (CVTL) iha tinan 2002 to’o 2005. Hanesan Assessora Direitus Humanos na Primeiru-Ministru iha 2001 to’o 2006. Hanesan Vise-Ministra Justisa iha 2006. Hanesan Membru ba Comissão Verdade e Amizade (CVA) iha tinan  2005 to’o 2008.

Hanesan Prezidente Sekretariadu Apoiu bá Komissaun Promosaun PNTL iha 2009 to’o 2010. Prezidente ba Comissão de Acompanhamento do Processo de Promoções na PNTL iha 2009 to’o 2010. Komissária ba Comissão Função Pública iha 2011 to’o 2014. Assessora Jurídika ba Sekretáriu Estadu Seguransa iha 2009 to’o 2015. Primeira-Dama de Timor-Leste entre 20 Maiu 2012 no 20 Maiu 2017. Assessora Jurídika Ministru Interiór iha Fevereiru 2015 to’o Juñu 2015; Konselleira ba Ministru Edukasaun no Advogada ba Labarik sira iha Setembru 2015 to’o Agostu 2017. Assessora ba Sekretária Estadu Protesaun Sivil desde Agostu 2018 to’o agora.

Hanesan Koordenadora Grupu Traballu ba elaborasaun Lei referente ba Provedoria Direitos Humanos no Justis ho atividade relativa sira ba ninia estabelesimentu iha 2001-2005. Koordenadora Grupu Traballu ba Planu Assaun Nasional  Direitus Humanus iha tinan 2003-2006; Membru Grupu Traballu ba elaborasaun Lei Antigu Kombatentes iha tinan 2004-2005; Membru Grupu Traballu ba estabelesimentu Komissaun Buka Tuir Ema Lakon Durante Funu iha tina 2005; Membru Grupu Permanente Governu no Igreja tinan 2005. Membru ba Komissaun Nasional Direitus Labarik iha 2005-2006. Membru Konsellu Superior Ministériu Públiku 2006-2011. Koordenadora ba Komissaun Instaladora ba Jestaun Fronteira, iha 2009-2010. Koordenadora ba Komissaun Negosiasaun Akordu Suplementar PNTL iha 2009-2010.

Fundadora ba Associação das Famílias dos Antigos Combatentes (ASSOFAC) iha 22 Novembro 2009. Hanesan Fundadora ba Centro Quesadhip Ruak, ho nia Sede iha Taibessi, Dili, Timor-Leste desde 2012 too agora. Assumen funsaun hansan Prezidente Komité Paralímpiku Nasional Timor-Leste desde 26 Abril 2019 to’o agora.

Isabel da Costa Ferreira kaben ho Antigu Prezidente Repúblika RDTL no atuál Primeiru-Ministru VIII Governu Konstitusionál, Taur Matan Ruak desde Maiu 2001 no iha oan feton na’in-rua mak hanesan Lola ho Tamarisa no oan mane ida ho naran Quesadhip.

Rate this item
(0 votes)

Independente Digital TV