Tuir informasaun ne’ebé Online ne’e asesu katak, Saudozu hakotu iis tanba sofre moras derrepente iha loron 17/06/2023 kalan, iha nia rezidénsia no família sira evakua ba halo tratamentu saúde iha Klínika Stamford, maibé la konsege salva nia vida.
José Luis Lobato hanesan maun husi Saudozu matebian, hatete, durante ne’e sira nia alin Luis Lobato kondisaun diak hela, tanba Saudozu sempre ba iha Gym no nia mós horseik (17/06) sei joga karta ho nia kolega no primos sira iha nia rezidensia Delta, maibé derepente akontese iha kalan ne’e.
“Sira ba fanun ha’u iha tuku 04:00 dader, maibé tuir informasaun ne’ebé ha’u simu, nia komesa toba iha tuku 19:00 tanba nia senti la dun diak, depois iha kalan boot nia senti aat liu ona, nia bolu nia oan para komu nia isin e iha tuku 02 ho balun dadar mak nia ataka ne’e forte liu, entaun sira tenki lori nia lalais ba óspital, lakonsege ba to’o iha HNGV, tanba iha dalan deit nia senti ladun diak, sira tama deit ona iha Klinika Stamford, maibé ha’u senti katak nia tama iha ne’ebá mós nia iss laiha ona,”dehan José Lobato, iha Rezidensia Matebian nian, iha Delta Nova, domingo ne’e (18/06).
Entretantu, molok ne’e, saudozu hanesan Vise-Ministru Saúde iha I Governu Konstitusionál períodu 2002-2007 no kontinua asume fali kargu hanesan Vise-Ministru Saúde iha VII Governu Konstitusionál.
Enkuantu, daudaun ne’e mate-isin iha nia ona nia rezidénsia Delta Nova, Díli, hodi hein atu haloot tuir prosesu lisan família no uma-lisan rasik.
Ho nune’e, tuir informasaun Saudozu sei ba haloot iha nia moris fatin Leorema, Munisipiu Líkisa.
Enkuantu, Saudozu husik hela nia fen ho oan mane na’in haat (4).
