Embaixadór Tailándia iha Timor-Leste, Atipat Rojanapaibulya hatete, komitmentu atu haforsa seguransa humana no hakbi'it feto no labarik sira iha Timor-Leste, foka liu bá aumenta sira-nia saúde, edukasaun, no oportunidade ekonómia.
“Nune'e mós, saúde ba inan no oan sira, sai hanesan tema sentrál bá koperasaun entre Tailándia ho Timor-Leste ba tinan ida-ne'e, liu hosi inisiativa lubuk ida aborda aspetu materiál no rekursu humanu," dehan Embaixador iha Edifisiu Embaixada Tailândia Faról, Sesta (31/05).
Nia afirma, maske oituan maibé komunidade Tailándia iha Dili iha partisipasaun ativu tebe-tebes iha atividade voluntariu oi-oin ho intensaun atu hakbi'it feto no komunidade vulnerabel sira seluk iha Timor-Leste.
Embaixador akresenta, intrega ápoiu monetáriu ne'e mós marka okaziaun auspisiosa ba Aniversáriu Sua Majestade Liurai Feto Suthida Bajrasudhabimalalakshana, iha loron-3 fulan-Juñu 2024.
Sua Majestade Liurai Feto hanesan defensora firme bá empoderamentu feto no protesaun ba labarik sira. Kolaborasaun ida-ne'e hatudu kompromisu Sua Majestade atu hasae vida feto no labarik sira nian.
Diretora Fundasaun Alola, Maria Imaculada Guterres hatete, fundu ki’ik ne’ebé apoia husi Embaixada Tailándia ho nia objetivu atu apoia ba iha programa hakbiit ekonomia feto ne’ebé mak Fundasaun Alola iha liliu hare ba iha kapasitasaun grupu artezenatu sira.
"Kapasitasaun ba sira hare liu ba hadia kualidade produtu no diversifikasaun produtu no mos oinsa hare ba iha kostumer sira, ida nee mak ami sei halo," Dehan Diretora.
Husi orsamentu nee Fundasaun Alola mós sei loke feira iha tinan 2024 ne'e dala rua iha fulan-Jullu no Dezembru atu fó oportunidade ba grupu artezenatu sira hodi fa'an fila-fali sira nia produtu ne’ebé iha nune'e hetan fali rendimentu hodi apoia sira-nia ekonomia uma laran.
Enkuantu, grupu artezenatu ne'ebé Fundasaun Alola rejistu no fó ona apoiu hamutuk 50 resin iha teritóriu laran tomak, no husi grupu nee iha produtu sira hanesan, tais, brinkus, vestidu, pasta, homan no seluk tan.