Kampaña ne’e realiza ona iha suko 16 iha Munisípiu Ermera husi loron 4 fulan Setembru, atu aumenta konsiensializasaun kona-bá saúde reprodutiva entre rezidentes lokal sira.
Tuir Komunikadu ne’ebé Jornalista INDEPEDENTE asesu, Embaixadór Kimura partisipa iha eventu final kampaña ne’e, atu komemora Loron Internasional Isin-Rua no Memória Mortus Infantil.
Enkuantu, ONG Japonezes Frontline implementa ona projetu “Hadi’ak Saúde Reprodutiva, Materna, Neonatal no Infantil (RMNCH) iha Munisípiu Ermera” ho fundu husi Governu Japaun hodi hadi’ak servisu saúde reprodutiva no sensibilizasaun ba rezidente sira iha Munisípiu Ermera desde tinan 2021.
Frontline hili Ermera nudar nia projetu fatin tanba taxa mortalidade infantil aas no mate durante isin-rua ka tuur-ahi.
Iha tinan 2022, akontese mortus infantil nian total 55 no mortus isin-rua/ labarik total 19 iha Ermera Iha tinan 2021, Frontline konstrui ona Uma Maternidade iha Sentru Saúde Guisaduru atu reduz mortalidade maternal no infantil, no atu hadi’ak asesu ba servisu saúde ba rezidentes lokal sira.
Iha tinan 2022, inan isin-rua hamutuk 288 mak partu ona no inan isin-rua hamutuk 495 mak simu ona atendimentu pré-natal iha edifísiu ne’e.
Aleinde ne’e, Frontline fornese ona aparellus ultrassonografia portáteis 29 ba postu saúde sira iha Ermera no Institutu Nasional de Saúde (INS), iha tempu hanesan estabelese ona formasaun ultrassonografia obstetrika nian ba dahuluk iha Timor-Leste. Frontline kapasita ona profissionais saúde 25 iha Ermera liuhosi projetu ne’e no na’in 10 husi sira ne’e mak sertifikadu ona nudar profissionais ultrassonografia obstetrika no ginekolójika husi INS. Liuhosi projetu ida ne’e, inan isin-rua hamutuk 4000 sei hetan asesu ba ultrasonofrafia obstetrika nian, profisionais saúde hamutuk 35 resin no funsionáriu governu nian sei hetan benefisiu husi kapasitasaun no dezenvolvimentu sistema saúde RMNCH, no voluntáriu médiku na’in 100 liu sei hetan koñesimentu kona-ba isin-rua no tuur-ahi (partu) ho seguru, no adisional membru komunidade hamutuk 16,000 sei hasa’e sira nia sensibilizasaun ba saúde reprodutiva inklui importânsia atu simu ezame ultrassonografiku periodikus liuhosi kampaña sensibilizasaun, rezulta iha redusaun ba mortalidade maternal no infantile evitável.
Durante eventu ne’e, Embaixadór Kimura hato’o ninia diskursu no expressa ninia esperansa ba projetu ne’e hodi hateten, “Projetu ho durasaun tinan-tolu ne’e agora tama ona ninia tinan ikus nian.
“Ha’u hakarak enkoraja Ministériu Saúde, INS, no Departamentu Saúde Munisípiu Ermera atu utiliza ho maximu uma maternidade ne’e, makinas portáteis ultrasonografia nian, no treinamentu ba ultrasonografia obstétrika ba iha tinan barak. Há’u hein katak susesu hirak ne’e sei partilla hanesan ba iha fatin seluk fora de Munisípiu Ermera,”dehan Embaixadór Kimura.
Entretantu, eventu ne'e partisipa husi Administrador Munisípiu Ermera Eusébio Salsinha, Xefe Departamentu Saúde Inan no Oan iha MS, Augusta Amaral Lopes, Ministériu Saúde, no mós Embaixadór Japaun iha TL, Tetsuya Kimura.
