Tuir Diretór Eskola 04 Setembru UNAMET, Balide, Martinho Menezes hatete, iha eskola refere, total estudante finalista ne’ebé tuir ezame nasional hamutuk 1.184.
Nia hatutan, tuir lolos regra ne'ebé fó sai ona husi Ministeriu edukasaun katak kada sala de aula tenki akumula estudante masimu 20, maibé tanba estudante barak liu eskola refere tenki akumula estudante liu 40.
“Ezame nasional ne’ebé realiza ona iha loron 16 fulan-Outubru tinan ne’e, Eskola Sekundario Jeral (ESJ) 04 Setembro UNAMET Balide, nafatin akumula estudante 40 to’o 60 ba kada sala de aula hodi tuir ezame,”dehan nia ba Jornalista INDEPENDENTE, iha knar fatin, segunda (16/10).
Nia rekoñese, maske la tuir regra Ministeriu Edukasaun nian no fó impaktu ba exame nasionál, maibé nia garante ezame nasional ne’e sei la’o diak, tanba sala refere iha espasu hodi akumula estudante hirak ne’e.
Diretór eskola akresenta, seidauk bele relata, estudante hirak mak la tuir ezame nasional, no na’in hira mak tuir.
Nia deahn, hafoin ezame remata mak bele identifika estudante iha eskola refere, na’in hira mak la tuir ezame nasional
Entretantu, iha sorin seluk, Ministra Edukasaun Dulce de Jesus Soares, hafoin halo monitorizasaun ba ezame nasional hahú husi Eskola Bazika Central 30 de Agostus to’o iha Eskola Sekundaria Jeral 05 de Maio Bekora, nota katak, iha eskola balun kondisaun sala la dun diak. Tanba iha eskola balun, estudante na’in rua tur hamutuk iha kadeira ida hodi tuir ezame nasional.
