Tuir komunikadu imprensa ne'ebe Online INDEPENDENTE asesu, husi numeru kazu nivel nasional 1.198, maioria kazu ne'e akontese iha kapital Dili ho kazu 809.

Aleinde iha Dili, kazu dengue mosu mós iha munisipiu sira seluk hanesan, Ermera ho kazu 77,  Manatutu ho kazu  77, Baukau ho kazu 52 , Manufahi ho kazu 52, Kovalima  ho kazu 43, Bobonaro ho kazu  25, Likisa ho kazu 21, Aileu ho kazu  16, Ainaro 14  no Vikeke ho kazu 10 no  RAEOA ho kazu 2.

" Hare husi kazu ne'e Dili kontinua aumenta ho numeru ne'ebé aas no Munisipiu 11, inklui RAEOA mak dadaun ne'e rejista ona kazu dengue, dehan komunikadu ne'ebé Online INDEPENDENTE asesu, domingo nee (30/01).

Husi numeru kazu mate ne'ebé  rejista, na’in 11 iha Dili, na’in 4 iha Ermera, na’in 2 iha Kovalima, na’in ida iha Ainaro,  na’in ida iha Bobonaro no na’in ida iha Vikeke.

Total husi kazu ne'e, kapital Dili mak rejista aas liu ho númeru 809, kompostu husi Postu Administrativu Dom Aleixo ho total kazu 412, Postu Administrativu Cristu Rei ho total kazu 162 Postu Administrativu Na’in Feto ho total kazu 111 no Vera Crus ho total 102.

Entretantu, husi numeru kazu ne'ebe aumenta, Ministra Saúde husu nafatin ba populasaun atu aprejenta aan iha fasilidade saude sira ne'ebé besik, bainhira sente isin manas ka laran sa’e, liman ain sikun moras, atu bele hetan atendementu husi médiku sira.

Husu mós ba autoridade munisipiu no autoridade lokal sira atu bele orienta komunidade hala'o limpeja jéral iha ida-idak nia aldeia no suku, fase tanke, bidon ka balde semana ida dala ida, limpeza roda aat sira no vazu aifunan atu susuk labele tau tolun no mós uza roupa liman naruk bainhira iha tempu kalan no loron.

Asistente Editor: Saturnina da Costa