Pesoal CVTL, Angelica Pinto informa, iha loron dahuluk vizita Amu Papa, ekipa CVTL evakua sarani 16 ne’ebé dezmaia bainhira forma iha dalan ninin hodi simu Amu Papa.

“Horsehik ami ekipa CVTL halo evakuasaun ba sarani sira ne’ebé dezmaia hamutuk 16,” informa Angelica iha estasaun Ambulansia, rotunda Nicolau Lobato Komoro, Tersa (10/09).

Enkuantu iha loron daruak ne’e, to’o iha tuku ida, ekipa CVTL evakua ona sarani na’in haat.

Ho nune’e provizoriamente sarani na’in 20 Mak hetan ona evakuasaun husi ekipa CVTL

Maioria husi sarani ne’ebé evakua ne’e tanba dezmaia bainhira habai an iha loron okos.

“Sarani sira dezmaia ne’e ami lori mai iha fatin, se bele entaun médiku sira halo atedimentu, karik sarani sira-nia kondisaun grave liu CVTL labele ona atende ami transfere ba iha HNGV. Maibé agradese horsehik ne’e sarani sira dezmaia maibé sei bele kura,” katak nia.

Entretantu, ekipa CVTL na’in hitu mak koloka iha kada estasaun hamutuk ho pesoal saúde na’in 10.