Atu halo kontrolu di’ak liu tan ba area fronteira rai-maran iha situasaun ohin loron, eis Ministru Defeza no Seguransa (MDS) Agustinho Sequeira ‘Somotxo’ sujere ba Ministru Interior no Ministru Defeza atu tuur hamutuk hodi buka solusaun.

“Governante ne’ebé toma responsabilidade halo estudu ida atu hetan loloos medida ne’ebé aumenta efetivu, muda polisia sira tau fali militar, ne’e tenke halo estudu ida hodi hatene loloos problema ne’e iha ne’ebé,” dehan Somotxo iha Parlamentu Nasionál, Kuarta (16/09).

Atual Prezidente Komisaun B trata asuntu Defeza, Seguransa no Negosiu Estranjeiru ne’e dehan, MI no MD presiza identifika rede ne’ebé durante e’e fasilita atividade illegal iha fronteira.

“Hahú kedas Timor ukun an, la hatene rede ne’e see mak monta iha mota sorin no monta iha rai laran, ne’ebé movimentu ne’e la’o hela, hanesan governante sira ne’ebé troka malu ne’e sira-nia tilun rona, matan haree, maibé to’o agora seidauk hetan solusaun,” dehan nia.

Tuir nia, presiza halo estudu hodi identifika failansu iha ne’ebé no identifika mós ema sira ne’e mak envolve ba rede.

“Kuandu ita laiha ona interese, entaun abuzu sira komesa iha, ‘governu, estadu laiha interese ha’u ba mai mós di’ak hela, liu husi dalan ka illegal livre’,” dehan nia.

Tuir nia, problema illegal ba sa’e sintu laos foin mak akontese maibé uluk kedas tanba ema la interese.

“Uluk kedas ha’u dehan membru ne’ebé ba sa’e sintu iha Indonezia ne’e traisaun ida ba ita-nia rai, traisaun tanba objetivu ida sira ba mota sorin hodi hasa’e sintu ka sabuk, kuandu hakat liu ita-nia fnonteira ne’e krime tiha ona, krimre ida tan mak halo traisaun ba ita-nia rai, ita-nia nasaun,” dehan nia.

Lere: MI Tenke Responsabiliza

Entretantu, Xefe Estadu Maiór Falintil Forsa Defeza Timor-Leste, Maijór Jenerál Lere Anan Timur hatete, Ministériu Interior tenke responsabiliza ba movimentu illegal iha fronteira, liu- liu movimentu husi membru grupu Persaudaraan Setia Hati Terate (PSHT).

Tuir Lere, movimentu illegal ne’e kontinua mosu ema ruma fasilita, hanesan uluk funu gerileiru sira mai to’o vila sa’e karreta la’o tun-sa’e tanba ema iha atu akompaña.

“Ha’u hanoin katak sira mai ne’e deteta ne’e tanba sira kumpri ona sira-nia objetivu ka sira-nia hakarak ne’e, no sira ne’ebé ba ne’e la’os ba buat seluk maibé ba hasa’e sira-nia sabuk,” dehan nia.

Lere preokupa mós tanba sa mak bainhira membru PSHT kuaze 300 tama ba Atambua, Indonezia ema la deteta, maibé hafoin fila mai TL mak deteta.

“Tama-sai ilegal ne’e see mak fasilita? tenke deteta tanba ema 300 tama ne’e la’os tama naran de’it, sempre ema ruma fasilita, see mak fasilita ne’e maka husu ba Komandante Jerál PNTL ninian, husu ba MI ka Vise MI, sira mak tenke responsabiliza, tanba saida mak ema 300 tama ne’e ema la deteta? entaun sira mós dala-ruma tama hotu,” dehan nia.

Vise MI: Tama Ilegal Tanba Fronteira Luan

Vise Ministru Interior Antonio Armindo hatete, atividade illegal iha fronteira hahú buras iha fulan hirak ikus ne’e tanba area fronteira rai ne’ebé luan nune’e maske monta UPF no F-FDTL barak labele kontrola ho di’ak.

“Kestaun sira ne’e akontese tanba hanesan imi hotu hatene ita-nia fronteira luan entaun bele tau polisia no F-FDTL barak jatamentente sempre akontese nafatin nune’e husu ba sidadaun hotu-hotu atu taun konsiensia nafatin tanba buat ida illegal ne’e la di’ak” dehan Antonio iha Palasiu Governu, Kuarta (16/09).

Maske nune’e, nia hatete, nia parte sei koordena ho komando PNTL atu hasa’e númeru PNTL.