“Ha’u hanoin iha situasaun ida ne’e, ita nia kontekstu dezenvolvimentu Nasional iha problema oioin mak ema ho defisiénsia infrenta, liliu bareira ida mak bareira asesibilidade,”dehan nia iha Salaun MTK,  sesta foin lalalis.

Nia dehan, ko’alia kona ba asesibildade, dalan ka estrada públiku sira no mós edifisiu públiku sira nia asesu ba ema ho defisiénsia ne’e limita.

Aleinde ida ne’e, bareira atetude ka hahalok pesoal sira nian ba ema ho defisiénsia sai prekupasaun no sai bareira ida ne’ebé impede.

“Ezemplu, ema nia prekupasaun ka hanoin ba ema ho defisiénsia katak, ema labele halo buat ida no sira merese deit ba apoiu ka tulun ruma entermus karidade,”tenik nia.

Maibé, bele hanoin kona ba oportunidade no mellora kondisaun sira atu ema ho defisiénsia hola parte.

Ezekutivu ne’e hatutan, bareira ida seluk mak bareira instituisional. “Bareira instituisional ita ko’alia kona ba alokasaun rekursu sira husi Estadu, maske Governu iha politika ba asuntu defisiénsia no planu asaun nasional ema ho defisiénsia, maibé alokasaun rekursu menus, ida ne’e mós sai bareira ida partisipasaun ema ho defisiénsia,”hatuir nia.

Nia akresenta, situasaun ida ne’e mak dadauk ne’e ema ho defisiénsia infrenta.

Nia deha, tuir dadus estatistika tinan 2022 nian, hatudu total ema ho defisiénsia iha teritoriu laran tomak hamutuk rihun 93 resin. Husi númeru ne’e, iha rihun 17 mak sai vulneravel liu.

Tanba ne’e mak, ADTL rekomenda ba ministeriu hotu atu aloka rekursu no hotu-hotu tenki halo intervensaun ba asuntu defisiénsia.

Nune’e mós, Orsamentu Jeral Estadu ne’ebé kada tinan diskuti tenki aloka mós ba asuntu defisiénsia nian no mós Governu tenki halo planu atu responde ba nesesidade ema ho defisiénsia nian.