Kordenadora Sentru Integradu ba Jestaun Krize (SIJK) Odete Viegas hatete, maske EE remata ona, maibé governu sei toma nafatin medida preventiva sira hodi halo nafatin distansia fizika, uza maskara, labele halibur malu barak liu, fase liman lorloron no liu-liu halo kontrolu masimu ba sira ne'ebé tama liu husi fronteira mai iha TL.
Nia apela mós ba komunidade sira atu kumpre nafatin regra ba prevensaun Covid-19 nian, tanba maske EE remata ona maibé situasaun Covid-19 seidauk remata no kazu afetadu sei nafatin mosu iha nasaun viziñu sira, hanesan Austrália no Indonesia.
“Se ita nafatin iha konsiensia atu uza nafatin medida sira ne’ebe Ministériu Saude no Organijasaun Mundial Saude nian entaun ita idaidak bele prevene an nafatin husi Covid-19 ne’e hodi evita transmisaun ba iha ita-nia an, familia no mós ba komunidade sira,” dehan nia iha fatin izolamentu, Tasi Tolu, Sesta (26/06).
Kona-ba estensaun EE, Odete dehan, Komisaun Interministerial liu husi ninia reuniaun deside atu la estende tan estadu emerjensia, no Konsellu Ministru aptova Dekretu Lei ba Vijilansia Sanitariu no Vigilansia Epidomolojia.
Objektivu husi dekretu lei ne’e, nia dehan, atu fó biban ba Ministeiru Saude hodi bele fó atensaun no kontrola ba pontu entrada sira, hanesan fronteira rai-maran, portu, no eeroportu, hodi bele tau ema sira ne’ebé tama mai husi fatin afetadu no ema sira ne’ebé suspeitu iha kuarentena no izolamentu molok tama mai iha Timor-Leste.
“Ida ne’e mak ita presiza atu regula nafatin ema sira ne’e, se lae EE hotu estadu labele hasai ona direitu sidadaun sira nian, dehan Odete.
Iha oportunidade ne’e, Odete husu mós ba autoridade lokal sira atu kontrola nafatin sira-nia area, karik iha ema ruma ne’ebé tama ilegalmente liu husi fronteira, bele informa lalais ba parte seguransa no pesoal saude sira atu bele tau lalais sira iha fatin izolamentu no kuarentena.
Daudauk ne’e, nia dehan, Organizasaun Mundial Saúde apoiu kama 38 no iha semana oin sei lori ba kuarentena iha Batugade.
Aleinde ne’e, sei aumenta tan mós fasilidadeiha iha kuarantena Suai no Maliana, inklui hotel balun atu bele priense rekejitus hodi sai kuarantena bainhira presiza.
