Diretór Eskola Ensinu Báziku Sentral 10 Dezembro, Komoro, Calistro A. Guterres hatete, komisaun hala’o hela servisu hodi prepara pontus ezame ba estudante sira, hahú husi estudante setimu ano to’o nonu ano.

“Preparasaun ba ezame segundu periodo, ami iha semana rua liu ba prepara pontus ezame ne’ebé maka dadaun iha hela ha’u nia fatin no komisaun ohin servisu namanas hela prepara pontus ezame sira bazeia ba númeru alunus husi 7° ano  to’o 9° ano, depois pontu ezame sira hatama ba iha envelope, no aban (kinta) halo verifikasaun,”dehan Diretór EBC 10 Dezembro, Komoro, ba Jornalista Online INDEPENDENTE, iha nia knar fatin, Kuarta ne’e (09/07/25).

Hafoin halo preparasaun ba pontus ezame ba estudante sira,Dirijente eskola ne’e dehan, iha sesta, loron 11 fulan ne’e, sei taka sai orariu sir aba ezame nian no iha loron sabado (12/07) sei organiza estudante sira hala’o limpeza jeral, hodi prepara ba ezame.

Diretór eskola ne’e hatutan, total estudante iha EBC 10 Dezembro ne’ebé atu tuir ezame periodu daruak ne’e hamutuk na’in 863, maibé iha mós estudante sira husi Eskola Rainha da Paz ne’ebé Ministeriu Edukasaun liu husi Servisu Edukasaun Munisipiu Dili transfere ba iha EBC 10 Dezembro hamutuk na’in 39. Tanba ne’e, komisaun prepara mós pontus ezame ba sira.

“Iha segunda ne’e Ministeriu Edukasaun atravez Liu Husi Diresaun Edukasaun munisipal Dili halo tan transferensia ba estudante sira ne’ebé durante ne’e iha hela problema nia laran, liliu estudante husi Eskola Rainha da Páz ne’ebé mai tan iha EBC 10 Dezembru hamutuk na’in 39, nune’e, ohin ha’u hatete ba komisaun atu prepara tan postu ezame ba estudante transferensia sira,”tenik Diretór eskola ne’e.

Entretantu, nia akresenta, kona ba sala de aula, dadauk ne’e sufisiente hela, menus maka kadeira ho meza, maibé dirijente eskola sei buka meus hodi resolve, nune’e estudante sira bele tuir ezame ho diak.

Enkuantu, total sala de aula iha EBC 10 Dezembro, Komoro, hamutuk 24 no total manorin hamutuk 47 kompostu husi mane na’in 23 no feto na’in 24.