Xefe Departamentu Sala Emerjénsia, Eldegar Lopes Martins hateten, husi nain 14 ne'ebé iha pediatria ne'e na’in 11 foin primeira vez sofre moras ne’e entaun haruka ba fali uma no hanorin inan no aman sira bainhira mai halo konsulta fila fali iha loron rua ka tolu tuir mai no na’in ida mak tenke baixa duni.

Iha fulan Dezembru mós iha pasiente na’in ida mai ho dengue, ne'ebé hatudu katak, kondisaun la di’ak, no parte emerjénsia la konsegue estabiliza ba baixa iha laran entaun labarik nain ida lakon vida ho idade 6.

"Pasiente sira ne'e, balun mai husi Dili laran no balun mai husi munisipiu Ermera, Liquiça no Manatuto,” nia hateten iha HNGV, Kinta (05/01/2022).

Tanba ne’e, husu ba  inan-aman sira presiza kuidadu oan sira tanba agora tempu udan, ne’e duni presiza be'e sira ne’ebé nalihun ne’e hamos tutuir.

Bainhira labarik isin manas maka’as ne'e favór ida lori lalais ba iha sentru saúde sira ne'ebé mak besik, kuandu halo teste mak pozitivu bele haruka mai iha ospital sira atu halo observasaun.

Ih Parte seluk, Diretora Serbisu Saúde Munisipiu Dili, Agustinha Segurado hateten Ministériu Saúde fó atensaun makas duni ba prevensaun moras dengue.

Prevensaun ne’e ho maneira oioin mak hanesan fahe informasaun ba komunikadu kona-ba oinsa moris iha ambiente ne’ebé moos, inklui fahe abate iha fatin risku sira.