Diretór Gabineti Relasaun Externa no Komunikasaun (GREK-APC) Anacleto Caitano hatete, tipo husi dezastre naturais ne'ebé akontese iha loron 21 to'o 27 fulan-Fevereiru mak ahi-han uma no anin boot sobu uma.

Nia dehan, akontesimentu ne'e akontese iha Munisipiu hitu (7) inklui Rejiaun Autónomo Espesial Oekusi Ambeno (RAEOA).

Iha Munisipiu Aileu anin sobu uma ida (1), Kovalima anin sobu uma ida (1), Ermera anin sobu uma rua (2), Dili ahi han uma ida (1), Líkisa anin sobu uma tolu (3) no ahi-han uma ida (1).

Aleinde, iha Munisipiu Lautem ahi-han uma ida (1), Manatutu anin sobu uma ida (1), Vikeke anin sobu uma tolu (3) no ahi-han han uma haat (4) no mós RAEOA anin sobu uma sia (9).

"Momentu akontese dezastre, komandu Munisipal APC fó kedas apoia emerjensia ba komunidades sira ne'ebé afetadu ho tipo apoiu mak food item no la’ós food item," dehan nia iha knar fatin SEPS, Kaikoli, segunda (27/02).

Nia esplika, kona ba rekoperasaun ekipa APC sei ba hahú verifika ba uma hirak ne'ebé hetan estragus hodi identifika fila-fali ida ne'ebé tama iha kategori aat kaman no aat total.

"Ba vítima husi dezastre naturais sira iha munisipiu, dadaun ne'e sira hela iha viziñu nia uma, maibé ba munisipiu Dili iha uma-kain 38 mak hela iha areadores Palasiu Prezidensial nian, uma-kain rua (2) mak hela iha kos no uma-kain 10 hela iha karantina Tasi-Tolu.

Iha biban ne'e mos, Autoriedade protesaun sivil (APC) nafatin apela ba komunidade sira ne'ebé hela iha fatin risku hanesan foho lolon, tasi ibun no mota laran atu kuida nafatin imi nia an, uma no sasan sira, tanba agora udan mós makaas.