Situasaun hahú manas iha Parlamentu Nasionál iha Segunda horsehik (18/5) nuudar loron dahuluk, Bankada tolu, FRETILIN, PLP no KHUNTO tentativa hadau kadeira no meza Presidente Parlameentu Nasionál atu ba tuur hodi hala’o sesaun plenaria.

Maibé aktu ne’e, hetan reasaun makas husi deputadu CNRT, ne’ebé akontese hasesuk malu entre Segundu Vise-Presidente Parlamentu Nasionál, Maria Angelina Sarmento ho Deputada CNRT sira seluk.

Iha hasesuk malu ne’e, Deputadu CNRT José Virgilio mosu no hakuak metin kadeira Presidente Parlamentu Nasionál hodi hakilar dehan “laiha ema ida atu foti kadeira ne’e”. Maski nunee, la konsege rejolve too loron ohin.

Ohin, kontinua akontese hasesuk malu no hadau malu kadeira. Ba loron daruak Atuasaun Bankada partidu CNRT iha Parlamentu Nasional hahú baku-fila ona meza Prezidente PN.

Tuir observasaun, INDEPENDENTE Online, tersa (19/5) iha Parlamentu Nasionál, nota katak meza PPN baku-fila husi Deputadu Jose Virgilio no Deputada Bisoi.

Kazu ne'e akontese fali tanba Bankada Partidu tolu hanesan PLP, FRETILIN no KHUNTO ne’ebe tenta hadau meza PPN nian.

Deputadu CNRT Virgilio ne’ebé hakilar loke hirus matan dehan “CNRT sei la fó fatin ba se de’it atu sama konstituisaun”.

Nia hakilar katak, hanesan juventude rejistensia ne’ebé uluk mos defende rai sei la fó fatin ema halo violasaun ba konstituisaun.

Enkuantu Bankada PLP nia deputadu maioria tuur ho PD, Frente Mudansa, PUDD ne’ebé hili dalan tuur hakmatek maib FRETILIN ho CNRT maka hakilar malu iha plenaria laran.

Oras ne’e daudaun polisia husi BOB iha ona sala plenaria laran maibé ho hamrik hakmatek la halo reasaun ruma.

Deputadu Antonino Bianco husu ba polisia atu halo atuasaun ba deputadu sira ne’ebé sobu ona fasilidade orgaun soberania nian.

Maibé deputadu CNRT Jose Virgilio hatan katak Polisia laiha direitu atu tama plenaria. Iha sala laran deputadu sira husi bankada CNRT hakilar Viva CNRT.