“Favor ida, hakarak fó subsídiu $100 ba povu kiik sira, fó lalais, labele dehan ohin, pois aban, bainrua, baintolu, maibé realidade povu hein ho esperansa mamuk tebes, liu-liu povu sira ne'ebé iha área remotas,” dehan nia iha PN, Tersa ohin (26/05)
Deputadu Bankada FRETILIN, Antoninho Bianco husu ba Primeiru Ministru (PM) Taur Matan Ruak atu orienta Ministeriu Finansas hodi aselera pagamentu ba subsidiu.
“Ha'u hanoin PM tenke orienta ba MF katak regras ezekusaun orsamentu Covid-19 no tenke regras espesiál estadu emerjénsia ne'e loron 30, entaun osan mós tenke ezekuta, agora tanba saida mak povu hakilar, hanoin MF labele hakruuk regras jerais, maibé tenke regras espesiál ne'ebé liga ba aplikasaun estadu emerjénsia," dehan Bianco
Vise Prezidente Parlamentu Nasionál, Luis Roberto da Silva hatete, durante implementasaun Estadu Emerjensia povu barak mak hamlaha ona tanba limita sira atu halo atividade hodi buka sira-nia moris.
Tanba ne’e, nia dehan, governu tenke aselera lalais pagamentu subsidiu $100 ba kada uma-kain atu bele sustenta sira-nia moris durante estadu emerjénsia.
“Bainhira iha estadu ida atu dekreta Estadu Emerjénsia, ita mós tenke iha preparasaun, liu-liu ba governu, atu bele responde mós emerjensia ba kondisaun povu nian, tanba ita kria tiha Estadu Emerjénsia la serbisu ho emerjensia, ida ne’e mak impaktu negativu mosu iha sosiedade nial leet,” dehan nia.
