Ministra Finansas interina Sara Lobo Brites hatete, subsidiu ne’e ho objetivu atu apoiu familia ne’ebé mak ho rendimentu kiik.

Nia dehan, forma husi subsidiu ne’e sei fó cash kada fulan, durante implementasaun estadu emerjensia.

“Orsamentu cahs kada fulan ho durasaun fulan rua, ho nune’e tulun uma-kain sira ne’ebé vulneravel liu,” dehan Ministra Sara iha salaun Ministeriu Finansas, Aitarak-Laran, Tersa (26/05).

Iha fatin hanesan, Direitor Jeral Minesteriu solidaridade Sosial no Inkluzaun (MSSI) Rui Manuel Exopsto informa, MSSI entrega ona dadus uma-kain hamutuk 326,739 ba Ministériu Finansas.

"Ami aprezenta ona dadus uma-kain ba ministeriu finansas, tan ne’e hein katak tempu badak sei implementa subsidiu ba uma-kain."

Tuir Diretór ne’e, seidauk iha data fiksu fahe subsidiu, hein de’it bainhira orsamentu tama ona sei hahú pagamentu.

"Data pagamentu ba uma-kain sira ne’e seidauk fiksa, bainhira orsamentu tama ona bankaria suku mak bele deside, kuandu sei iha hela prosesu nia laran ita labele determina lai, tan ne’e husu ita hotu atu bele hein tan uitoan,” dehan nia.