Aniceto hatete, maske nia iha interpretasaun ne’ebé diferente ho Xefe Estadu, maibé ba interese estadu nian, nia tuir de’it interpretasaun PR Horta.
"Ami iha interpretasaun diferente, ha'u ho Prezidente Repúblika, ami iha interpretasaun diferente, biar diferente tanba interese estadu nian, interese prosesu sira bele la'o, ha'u tuir interpretasaun Xefe Estadu nian. Ha'u tuir de'it Xefe Estadu nian, signifika loron 15 depois validasaun rezultadu husi Tribunál, prazu másimu ida ne'e tenke realiza ona primeira reuniaun."
"Biar ha'u la konkorda ho Prezidente Repúblika ninia interpretasaun ba interese estadu nian, ha'u konkorda atu realiza dentru prazu legál ida ne'e, biar nune'e ha'u sei ba konsulta lai ho líder bankada parlamentares atu fiksa data ida ezatu ba dentru prazu legál ida ne'e," dehan Aniceto hafoin remata ho PR Horta iha Palasiu Prezidensiál Bairu-Pite, Tersa (06/06).
Kona-ba interpretasaun diferente entre nia ho PR Horta, Aniceto hatete de’it katak, interpretasaun diferente ne'e signifika primeira reuniaun tenke akontese to'o lejislatura ne'e hotu.
“La presiza imi dezenvolve tan diferensia iha ne'eba, se dehan tuir interpretasaun Prezidente Repúblika nian mak dehan loron 15 ne'e,” dehan Aniceto ne’ebé rekuza esplika klaru kona-ba diferensia interpretasaun refere.
Molok ne’e, Prezidente Repúblika, José Ramos Horta konsidera urijente atu Parlamentu Nasionál marka ona data posse ba membru PN foun no governu dasia iha fulan Juñu ne’e nia laran.
Horta hatete, hafoin Tribunal Rekursu pronunsia rezultadu eleisaun, nia sei koalia ho Prezidente PN, Aniceto Guterres, hodi marka ona data ba ajendamentu posse ba deputadu foun nune’e governu foun bele simu mós posse no hahú aprezenta ninia programa iha PN.
"Tenke urijente, ha'u-nia preferensia urijente, ha'u sei ko'alia ho Prezidente Parlamentu Nasionál atu aselera prosesu ne'e. Ha'u-nia hanoin fulan ida ne'e duni, fulan Juñu," dehan PR Horta hafoin fila husi nia viajen servisu iha rai li’ur, iha salaun VIP Aeroportu Internasionál Nicolau Lobato Komoro, Segunda (05/06).
