Atu bele realiza mehi refere, Danilo, hahú ona prepara an hodi bele kompete iha eleisaun lider komunitaria. Joven ho idade tinan 27 ne’e prontu ona atu kandidata an ba Xefe Suku.
Danilo moris iha bairru Aifu, Aldeia Taklela, Suku Poetete, Postu Administrativu Ermera Villa, Munisipiu Ermera, iha 25 Outubru 1996. Oan daruak husi maun-alin na'in 8, husi Abrão Alves Martins ho Domingas Martins.
Danilo hahu ninia estudu iha eskola Primaria Nossa Senhora de Lurdes, Ermera Villa, husi tinan 2002 to’o 2007. Nia kontinua ba nivel Pre-sekundariu iha Eskola Pre-sekundaria 20 Agostu Ermera Villa husi tinan 2008 to’o 2010, no kontinua estudu iha nivel Sekundariu iha Eskola Tekniku Profisional Katolika Mater Micerecordiae Gleno husi tinan 2011 to’o 2013.
Hafoin remata, Danilo kontinua nia estudu ba nivel Ensinu Superior iha Institutu Siensia Relijioza (ICR), Lahane Osidental, Dili, ho programa Formasaun Profesores husi tinan 2015 to’o 2021.
Hafoin remata ninia estudu, iha tinan ida ne’e, Danilo hakarak kandidata aan ba Xefe Suku atu bele halo mudansa ba iha suku Poetete.
Atu bele atinze ida ne’e, tuir nia, presiza ema ne'ebé ho idade nurak no ho kapasidade ne'ebé kle'an, kritiku, inisiativa, inklui nu'udar mós ajente kontrolu ba programa sosial sira.
Bainhira iha eleisaun hetan fiar, Danilo kompromete aan sei implementa programa balun ne'ebé tuir nia sei fó benefisiu ba komunidade suku Poetete.
Nu’udar Xefe Suku, Danilo dehan, nia sei tu'un hasoru no ko'alia direita ho povu hodi hamutuk identifika problema ne'ebé sira enfrenta, buka solusaun, liu husi komunika ho parte kompetente sira.
Danilo mós sei esforsu hodi identifika kauza ne'ebé halo labarik sira la kontinua eskola iha idade ne'ebé produtivu.
“Dalan ne'e mak sei ko'alia ho parte kompetente hodi hadi'a kualidade no liu-liu hakbesik eskola ba iha komunidade sira-nia hela fatin, atu nune'e labarik sira bele asesu eskola ho lais ka besik, hodi labele la'o do'ok, ho distansia kilometru, ba iha fatin aprende nian,” dehan Danilo foin lalais.
Nu’udar Xefe Suku, nia hatutan, sei identifika no koordena ho ministeriu relevante atu rezolve nesesidade baziku povu nian, liu-liu bee-moos, infra-estrutura iha suku laran, rezolve no buka solusaun ba problema dezempregu hodi kria empregu iha suku laran no mós kontinua sensibiliza ka fó edukasaun sivika ba komunidade hodi aumenta sira-nia koñesimentu ba iha perigu konflitu familia.
Atu nune'e, nia hatutan, komunidade sira bele iha koñesimentu katak konflitu ne'ebé mosu iha li'ur no liu-liu iha uma laran bele afeta direita ba sustentabilidade moris uma-kain, ne’ebé bele prejudika direita no indireta ba oan sira-nia.
Danilo sei kria no hametin amizade entre joven iha suku laran liu husi atividade desportu. Aleinde ne’e, sei kria mós fatin ba edukasaun naun-formal atu bele hadi'a ka muda mentalidade joven sira nian hodi hado'ok aan husi konflitu.
Danilo mós sei haburas no haforte komunikasaun ho entidade estadu, sosiedade sivil no igreja, inklui komunidade rasik, hodi hamutuk dezenvolve suku sai propriedade konjunta.
