Nia relata katak, sábdu-ohin kazu konfirmadu Covid-19 mantein 24, kazu foun laiha, rekuperadu mantein 21, sei baixa iha fatin izolamentu na’in hitu (7), no mate laiha.

“Horisehik ema na’in 114 maka hein rezultadu maibé ohin ema na’in 34 maka nia rezultadu negativu ona entaun na’in 80 maka sei hein rezultadu,”dehan nia liuhusi konferensia imprensa iha CCD, ohin.

Nia informa, total rezultadu negativu hamutuk 750, ema ne’ebé rekuperadu ona hamutuk hitu (7), sei iha kuarentena hamutuk 173 kompostu husi Dili 107 no iha munisipiu 34 no ema ne’ebé halo auto kuarentena 34 iha munisipiu. Professional saúde sira ne’ebé iha kuarentena hamutuk 45 no ema ne’ebé sai ona husi kuarentena hamutuk 2.083 kompostu husi Dili 1645 no iha munisipiu 438.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku. Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.

Nia mós informa katak wainhira iha sintomas infesaun respiratória aguda (IRA)  hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira. Se lakohi atu hetan moras Covid-19 ne’ebé grave ka krítiku hapara fuma sigaru no hemu tua.