Entretantu evolusaun surtu Covid-19 iha Munisipiu Covalima deteta kazu foun pozitivu na’in ida. Kazu pozitivu ida ne’e halo viájen husi Dili iha loron 2 Abril 2021. Iha Dili hela iha Fatuhada.
Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Dr. Rui Maria de Araújo, informa kazu jerál kompostu husi kazu foun ohin (3/4) na’in 37, kazu rekuperadu na’in 51, total kazu ativu hamutuk 447. Husi total kazu foun ne’e, mane 25, feto 12, sintomátiku na’in 4 no asintomátiku na’in 33.
Husi númeru kazu iha Munisipiu Dili, iha cluster foun 5 no cluster 1 deklara inativu, ohin mosu fali.
Total iha cluster 56 maka sei nafatin hatudu atividade hada’et-tutan virus SARS-CoV-2, husi ema ida ba ema seluk, liu-liu iha Suku Madohi, Bebobuk, Fatuhada, Comoro, Bairro Pité, Vila Verde, Motael, Kulu-Hun, Lahane Oriental, Becora.
Husi sesta horiseik mai sabdu ohin hamutuk liuhusi Laboratoriu Nasional Saúde hodi halo teste swab (PCR) hamutuk 217, inklui 10 teste ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisipiu Dili.
Total pedidu autorizasaun esepsionál atu sai husi serka sanitaria iha Munisipiu Dili, sesta horiseik 2 Abril, hamutuk 53. Sekretariadu SIJK aprova pedidu 40 ne’ebé prienxe kritériu tuir rezolusaun Governu.
Husi loron 1 Abril to’o loron 3 Abril 2021, hamutuk hotu iha ema 1,137 maka sai husi serka sanitária Munisipiu Dili. Husi total ne’e 476 (41,8%) deit maka hetan autorizasaun esepsional husi SS-SIJK.
SIJK mós apela ba populasaun Timor-Leste tomak, atu nafatin hakmatek, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona:
Uza máskara
Fase liman beibeik ho sabaun ka dezinfetante ruma
Evita kose liman ba matan, inus ho ibun
Wainhira kumprimenta malu, lapresiza ka’er liman, bensa-liman, rei-malu ka haku’ak malu
Evita halibur malu barak
Hamriik ka tur dook husi ema seluk, mínimu metru ida ho balun.
Jornalista: Saturnina da Costa
Editor: Jose Sarito Amaral
