“Maioria, ka 58,2% maka halai sai, sem iha autorizasaun husi SS-SIJ),”dehan Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, sabdu ohin luhusi  zoom call, iha SS-SIJK, CCD Dili.

Rui esplika, Munisipiu sira ne’ebé ema barak-liu sai husi serka sanitária Minispiu Dili sem iha autorizasaun esepsionál maka, Ermera (528), Aileu (48), Viqueque (29), Ainaro (17), Manufahi (14), Liquiça (12), no Bobonaro (9), nunee total hamutuk 657.

Molok ne’e, tuir observasaun online INDEPENDENTE, sesta (2/4) hatudu katak, komunidade kuaze 200 iha pontu entrada Tasitolu, 250 iha pontu entrada Metinaro, no 100 iha pontu entrada Manleu Beduku, idak-idak ho nia transporte hakarak fila ba Munisipiu.

Iha pontu entrada sira, komunidade ida-idaik reklama sira nia rajaun, katak balun hahán laiha ona, estudante sira reklama laiha ona osan atu selu kos, no balun hakarak fila duni ba knua tanba laiha ona servisu.

Haree ba numeru komunidade ne’ebe ejize hakarak fila aumenta, autoridade seguransa kompostu husi forsa rezerva no Batalliaun Orden Publiku (BOP) serka metin iha area refere no la autoriza sira sai husi Kapital Dili.

Komunidade sira hasesuk malu ho parte seguransa, too ikus balun konsege ultrapasa liuhusi   pontu entrada ne’e, no komunidade balun lao-ain liuhusi ailaran seim hetan autorizasaun husi SS-SIJK.

Maibé komunidade balun seidauk to’o iha sira nia fatin, no balun hafoin too iha idak-idak nia Munisipiu, parte seguransa prende fali sira hodi submete ba teste swab.

Jornalista: Saturnina da Costa

Editor: Jose Sarito Amaral