Liu husi konferensia ne’e aprova rezolusaun hodi fó respostas ba ezijensia Prezidente Repúblika (PR) Frascisco Guterres Lú Olo nian ne'ebé husu koligasaun foun tenke prienxe rekezitus balun.
"Partidu CNRT liu husi konferensia nasionál ohin, deklara aprova rezolusaun hodi afirma partidu CNRT nian hodi responde ba rezultadu enkontru lideres nasionál sira nian ne'ebé fó sai iha 10 Fevereiru 2020," dehan Sekretáriu Meza Konferensia extraordinaria, Aderito Hugo da Costa, liu husi konferensia empresa iha sede CNRT, Bairro dos Grilhos, Dili ohin.
Aderitu haktuir, konferensia nasionál ne'e kontinua reafirma nafatin pozisaun partidu CNRT hodi mantein nafatin iha Aliansa Maioria Parlamentár (AMP) ne'ebé forma ona iha fulan Juñu 2018.
"Aprovasaun kompozisaun aliansa maioria parlamentár hodi akomoda liután vontade politika ne'ebé espresa husi partidu (PD), partidu Frente Mudansa (FM), partidu União Demokratiku Timorense (UDT) no partidu Unidade Dezenvolvimentu Demokrátiku (PUDD) atu hola parte iha aliansa maioria parlamentár, hodi hamosu konjuntura politika foun atu hakotu impase politika ne'ebé akontese iha ita nia rai," dehan nia.
Tuir observasaun jornalista INDEPEDENTE iha terenu katak iha konferesia estraordinariu ne'e partisipa mós Prezidente partidu CNRT, Kay Rala Xanana Gusmão, no parisipa masimu husi membru parlamentár no membru Gomvernu, inklui estrutura partidu ne'e rasik.
Tuir dadus katak, AMP 2018 ne’e kompostu husi partidu CNRT, PLP, KHUNTO hamutuk ho nia aliadu kiik sira hanesan UDT/FM, maibé AMP nakfera iha tinan 2019, tanba orsamentu jerál estadu xumba iha Parlamentu Nasionál bainhira aprejenta husi VIII Governu lideradu husi Primeiru Ministru Taur Matan Ruak.
Deputadu partidu CNRT ho pozisaun abstensaun ba OJE ne’e, tanba rajaun PM Taur seidauk bele rejolve lista pendente hamutuk nain hitu (7) husi CNRT.
Nunee PM Taur deklara katak CNRT mak hamate tiha AMP no PLP sei lakohi hamutuk tan ho CNRT.
Tanba ne’e iha tinan ne’e (2020), partidu CNRT forma fali koligasaun foun hamutuk fali ho PD, KHUNTO no PUDD, UDT/FM, maibé seidauk prienxe rekijitus tuir leis partidu politiku sira nian.
Maibé iha sorin seluk, hafoin CNRT ho partidu sira seluk forma koligasaun foun, PLP lori kedas kazu ne’e ba Tribunál tanba konsidera koligasaun foun ne’e illegal.
