Prezidente Bankada CNRT, Duarte Nunes hateten, iha tinan hirak ba kotuk governu planu ona harii bairru foun ba vítima inundasaun sira, maibé la haree nia progresu.

"Governu ko'alia osan iha atu halo (bairru foun) iha Hera, sira survey ona, maibé seidauk implementa to'o agora," dehan nia, iha Parlamentu Nasionál (PN), horisehik.

Nia hateten, tanba governu promete dehan tinan oin, karik tinan oin sira prosesa ona maski nune’e seidauk kumpre.

"Kondisaun ita-nia ema depois tinan ida ka rua iha lona okos, laiha kondisaun moris, ida-ne'e mak hanesan halo ita sente la justu. Ita iha osan atu halo buat barak, maibé ema ke terus ona iha ita-nia matan hela, maibé ita la ba rezolve," nia kestiona.

Duarte dehan, entaun iha diskriminasaun ba rai ne'e, liuliu ba sira ne'ebé uluk moris iha lona okos ne'e.

"Ita ko'alia bar-barak, maibé tinan hirak nia laran la rezolve ida-ne'e. Tanba ne'e ami sempre preokupa," tenik nia.

Nia subliña, maibé bankada rona katak uma besik atu halo ona iha Hera. Tanba osan governu husu Parlamentu Nasionál aprova ona.

"Sira mai husu osan urijénte, ita tau osan, atu atende ba ne'e, soke iha jestaun, osan ne'e ba fali buat seluk, depois ema sira ne'ebé terus ne'e sei nafatin ne'ebé hau hanoin ema sira ne'e sentimentu ba povu ne'e iha ka lae. Haree ema nia terus ne'e monu ba nia laran ka lae," tenik nia.

Nia fundamenta, ne'e mak bankada CNRT hanoin saida mak akontese ba governu ne'e.

"See osan laiha hau mós la kestiona, maibé osan iha atu halo ida-ne'e," tenik nia.

Molok ne'e, Ministru Obra Públikas (MOP), Abel Pires, informa nia parte tenta hela atu harii bairru foun iha Hera ho uma hamutuk rihun rua (2).

Tanba ne’e, ekipa MOP halo daudaun konsultasaun públiku ba populasaun sira iha Hera.

“Dezeñu agora iha prosesu hela, iha ministériu nian dezeñu ne’e prontu ona, agora hein tán konsultór mai, para haree apoiu liután, ne'e ita bele halo konstrusaun. Mais ne'e  tenke iha konkursu públiku, tanba ita hakarak halo mekanizmu entre Governu ho entidade privadu,” dehan nia.

Hataan kona-ba governu garantia ka lae, atu implementa planu ne’e iha tinan ne'e, Ministru Abel Pires promete, iha 2022 nia laran ne’e sei implementa duni.