Deputadu Bankada Partidu CNRT, Leandro Lobato hatete, problema karreta Prado sei sai polémika, tanba ne’e MUTL halo hela de’it asaun pasifika hasoru PN.

Iha asaun ne’e sira hatudu jestu oioin hodi halo protesta, liuliu halo kaixaun deputadu sira nian ne’e tanba falta komunikasaun entre parte MUTL no PN oinsá atu rezolve asuntu ne’e.

“Ita tenke halo diálogu ho alin estudante sira, atu nune’e bele esplika importánsia husi sosa karreta ba deputadu sira”, dehan nia, iha Uma Fukun PN horisehik.

Diálogu ne’e importante tebes atu buka solusaun ba problema ida, tanba dala ruma alin estudante sira la komprende didi'ak asuntu ne’e, entaun presiza PN halo diálogu ho sira hodi esplika.

Asuntu karreta ne’e deputadu Leandro foti iha plenária, maibé Prezidente PN Arão Noe la responde kestaun ne’e.

Antes ne’e, Portavós MUTL, Noe Bernardino Ximenes hatete, karta petisaun hatama ona ba PN tanba ne’e hein nafatin resposta husi Prezidente PN.

“Ami nia ezijénsia mak fó fila karreta Prado tuan no hapara sosa karreta foun, tanba ne’e karik laiha rezultadu ami sei kontinua halo asaun to’o iha loron 12 Novembru (2018)” dehan nia.

Observasaun diáriu ne’e, MUTL sira komesa monta fali ona panfletu no Sound System iha Kampus Ekonomia besik muzeu rezisténsia nian oin hodi hahú fali asaun pasifika.