Prezidente Bankada CNRT, Duarte Nunes vota kontra tanba tuir loloos Governu mai konsulta Parlamentu Nasionál molok hato’o pedidu ba Prezidente Repúblika.

“Tanba ita labele muda agora hanesan laiha mudansa ami hakarak tenke iha mudansa iha Estadu Emerjénsia, tanba ne’e ha’u vota kontra,”nia dehan.

Iha fatin hanesan, Deputadu Bankada CNRT, Ricardo Baptista mós hatoo nia rajaun vota kontra ho hanoin ida katak implementasaun ba Estadu Emerjénsia presija iha lei propriu ida atu kombate COVID-19.

“Laos ita aplika estadu emerjénsia ida ba povu no nasaun ne’e iha munisipiu hotu-hotu hetan krize,”nia hateten.

Tuir nia katak, iha nasaun balun ne’ebé afetadu COVID-19, sira mós iha lei propriu ida atu nune’e atu responde de’it situasaun surtu ne’e.

Vise-Prezidente Bankanda PLP, Francisco de Vasconselos vota afavor, tanba la implika sasan.

“Tanba agora ne’e deputadu sira tuur iha vidru laran falta taka iha leten ita tama iha akuarium laran, ne’e hatudu ita tauk,”dehan nia.

Tuir nia, nasaun hotu iha mundu laiha objesaun ba ida ne’e. Saida de’it uza detaillu maneira foti desizaun pronente, tanba ne’e labele politiza ida ne’e.

Tuir nia katak, di’ak liu halo prevensaun laos politizasaun.

Deputada Bankada CNRT, Carmelita Moniz vota kontra, tanba tuir esplikasaun  Primeiru Ministru nian katak kazu COVID-19 importadu seidauk iha transmisaun lokal.

Deputada Bankada KHUNTO, Olinda Guterres vota afavor, tanba moras virus labele afeta ba povu, maibé kolega sira ne’ebé dehan povu terus liu ona.

“Maibé xumba Orsamentu 2020 ne’e mak osan labele sirkula iha povu nia leet,”dehan nia.

Vise-Prezidente Bankada FRETILIN, Francisco Miranda Branco, vota afavor, tanba Estadu Timor-Leste prepara di’ak liu hodi hasoru virus ne’e atu defende povu labele mate.

“Vota afavor haree ba esperensia estuda sira ne’ebé susesu luta hasoru corona virus  hodi hasai medida rigor, tanba nasaun sira ne’ebé halimar ho situasaun ne’e ikus mai terus mate barak, tanis hakneak ba rai,”dehan nia.

Nia dehan, laos husi estadu emerjénsia mak rezolve virus ne’e, maibé atuasaun ne’ebé konkreta.

“Tanba ne’e ha’u fiar iha tempu badak ne’e favor ida ezekuta ona  medidas no husu par konjuntura hasoru COVID-19 nian ne’e boot sira tuur hamutuk par ita bele hasoru, ha’u vota afavor,”dehan nia.