Maski nune’e, jeralmente prosesu kampaña durante loron hitu ne’e la’o hakmatek, ba parpol sira no partidu koaligasaun sira kontinua respeita orariu kampaña no dok husi violensia.
Presidente CNE, Alcino Barris hatete, kampaña ne’e kontinua tuir nafatin koridor, maski FRETILIN no AMP iha palku politika sei kontra lei no regulamentu ne’ebé fó sai ona husi CNE.
Iha regulamentu no krime eleitoral ne’ebé CNE fó sai atu partidu politiku sira no partidu koaligasaun tenki kumpri mak la bele halo ajitasaun propaganda inklui respeita linguazen, maibé realidade parpol boot rua (FRETILIN no AMP) sei viola.
Presidente CNE mós la esplika detaillu kona ba linguazen ne’ebé mak konsidera halo ajitasaun propaganda. Maibé nia dehan, jeralmente situasaun la’o hakmatek no sei iha liña komandu.
“Bele dehan prosesu kampaña eleitoral la’o ho di’ak susesu tanba iha parte jeral ne’ebé ekipa avaliasaun CNE nian halo iha terenu parpol sira respeita orariu kampaña husi tempu hahú no tempu remata. parPol sira kontnua divulga informasaun ba militantes apoiantes no simpatizantes sira atu hadok an husi violensia,”dehan Presidente CNE ba jornalista sira, segunda (16/04)iha edifisiu CNE Kaikoli.
Barris akresenta kampaña ne’e nu’udar prosesu edukasaun sivika ida. Ne’e duni Parpol sira buka atu hadia an. Labele kria situasaun la di’ak atu lori fali povu ba kondiasaun violensia.
“Tanba husi linguazen ne’ebé lider sira fó sai ida ne’e mak sei hamosu konflitus ne’ebé ita la espera,”dehan nia.
Tanba ne’e, CNE rekomenda de’it atu prosesu kampaña eleitoral ne’e di’ak liu minimiza linguazen insulta malu tanba momentu ida ne’e povu sira hakarak rona programa husi parpol sira la’os atu ba rona fali problemas pasadu ne’ebé lider sira subar hela.
Entertantu vise Presidente Frente Dezenvolvimento Demokratiku (FDD), Nicson Lay afirma katak, esforsu ne’ebé FDD sei halo sei kontrolu ninia militante sira atu hamrik metin nafatin iha regras ne’ebé fó sai ona husi CNE.
Kampaña eleisaun parlamentar antesipada 2018 ne’e hala’o husi partidu haat (4), kompostu husi FRETILIN, Partidu Demokratiku, PEP, PR inklui partidu koligasaun AMP, FDD, MDN no MSD.
