Hafoin enkontru, Hugo relata katak, Xefe Governu kongratula ba CNC nia progresu servisu trimestral husi Fulan-Janeiru to’o fulan-Marsu no kontinua ba fulan Maiu iha progresu diak.
Tanba ne’e, PM husu tenke kontinua aliña preserva memoria istória pasadu sira no kontinua halo mapamentu ba fatin istoriku sira iha Timor-Leste.
“Programa ne’ebé ANC halo hato’o ba Primeiru Ministru, Taur Matan Ruak kontinua aliña ho politika Governu Konstituisional da-8 nian, liliu hare ba oinsa kontinua prezerva memoria pasadu sira, ita halo liuhusi peskiza istória sira, liu husi dizitalizasaun no mós mapamentu ba fatin istoriku sira ne’e ita lao nafatin,"dehan nia ba Jornalista sira iha Rezidensia PM Farol,Dili, Tersa ohin (25/05).
Nia informa, CNC halo esforsu hodi parseria ho país afrikanu ho lian-ofisial (Palop sigla portugués), inklui Portugal no Timor- Leste hodi halo pesikizasaun ho tema “Resistensia nudar Afirmasaun kultural”.
Nia dehan, projetu ne’e sei halo iha Timor-Leste durante tinan 3, ne’ebé sei hetan apoiu husi Instituto Camões no Uniaun Europeia, sei halo peskiza iha Timor-Leste hafoin ba aprezentasaun.
Nia kontinua reafirma katak, semana kotuk liuba CNC iha ona akordu ho KOICA ba apoiu finanseiru ba tinan 4 kuaze dolar amerika milliaun $ 5.
Orsamentu ne’e atu hodi hala’o programa importante tolu mak hanesan, primeiru harií dijitalizasaun arkivu no re-abilitasaun sentru arkivu, segundu harií sentru edukasaun ba dame no terseiru mak hala’o programa enterkambio kona-ba konflitu, rekonsiliasaun iha rejional.
Ho nune’e Primeiru Ministru fó orientasaun bele halo ajustamentu uituan ba programa tanba haree tinan ida ne’e ho durasaun programa barak mak labele halo iha munispiu sira, entaun haree hela ajustamentu atu nune’e iha fulan-Juñu bele halo revizaun ba orsamentu.
Tanba ne’e, CNC labele ezekuta nia orsamentu ho pursentu 100 (100%).
Nia akresenta, iha trimestral dahuluk CNC hetan osan dolar amerikanu hamutuk $ 720,000 no osan refere utiliza deit $ 272,000.
Asistente Editor: Saturnina da Costa
