Diretór Ezekutivu CNC, I.P, Hugo Maria Fernandes hatete, oferese uma ba sobrevivente sira ne'e nu'udar estadu nia responsabilidade ba nia povu ne'ebé hetan torturasaun durante okupasaun.

"Tinan ida ne'e ita halo uma tolu, uma ida mak iha Bekora, ida iha Kuluhun, no ida iha Aisirimou. Halo uma ida ne'e mós ita hetan apoiu husi ita-nia parseiru di'ak CHL. Uma tolu ne'e kompleta uma 18 ne'ebé mak CNC hahú harii, balun iha Munisípiu Aileu, Vikeke, Suai, Ainaru, Ataúru no Likisa," dehan Hugo, hafoin entrega uma ba sobrevivente na’in rua iha Postu Administrativu Kristo Rei, Kuarta (26/06).

Tuir nia, ida ne’e nu’udar programa medida reparativu ba sobrevivente sira atu oinsá mak estadu hatudu nia responsabilidade ba vítima sira husi konflitu naruk no vítima sira ne'ebé hetan torturasaun durante okupasaun.

Kona-ba sobrevivente mais vulnerável, nia dehan, estadu seidauk halo buat boot ida ba vítima sira, maibé neineik estadu hatudu duni nia responsabilidade, hahú husi halo uma, tratamentu saúde, no fó bolsu estudu ba oan sira.

“Ne’e nu'udar responsabilidade Governu nian ba vítima sira,” dehan nia.

Diretór CHL, Joselino Bermarco, agradese ba CNC tanba servisu hamutuk ho di'ak no ikus mai entrega ona uma ne'e ba vítima sira.

"Agradese tebes tanba bele servisu hamutuk ho susesu, ba oin ami konsisténsia nafatin fó asisténsia dezeñu, kuandu ita-boot sira presiza," katak nia.

Vise-Ministru Administrasaun Estatál (MAE), Jacinto Rigoberto hatete, estadu iha devér morál atu tau atensaun ba vítima sira-nia kondisaun ne'ebé daudaun ne'e sira iha.

"Imi (vítima) sakrifika imi-nia aan ho situasaun ne'ebé imi iha ba ita-nia rai doben ida ne'e, tanba ne'e estadu iha devér hodi valoriza no kria kondisaun ba imi, ami la fó parabéns ba imi tanba ami iha devér morál atu valoriza no tau-matan ba ita-boot sira," dehan nia.

Governu agradese ba CNC ho nia ekipa ba inisiativa ho ideia di'ak ne'ebé iha hodi tau-matan ba sobrevivente sira.

"Agradese tebes ba CNC ho nia ekipa no dezeju bele nafatin tau-matan ba sobrevivente sira, tanba sobrevivente barak mak iha Timor ita seidauk identifika hotu no la tau-matan ba sira, servisu sira hanesan ne'e ita kontinua hakaas an hodi koopera malu di'ak liu tan, agradese mós ba CHL tanba la'ós de'it apoiu dezeñu maibé mós ho fundus balun," Jacinto dehan.

Administradór Postu Administrativu Kristu Rei, Fernando da Silva, agradese ba Governu tanba bele tau-matan ba vítima sira ne'ebé uluk hetan torturasaun.

"Ami haree hela sira-nia kondisaun maibé ami labele tau-matan ba sira, tanba ho kbiit ne'ebé ami iha, maibé agradese ba Governu tanba ohin loron sira hetan netik uma mahon ba sira hodi sira bele hamahan-aan ba. Nafatin husu ba parte Governu atu tau-matan mós ba vítima sira seluk," dehan nia.

Sobrevivente Pedro Perreira de Araújo, kontente no agradese ba Governu tanba bele hetan uma mahon ida ba nia ho nia familia.

"Durante ne'e ha'u ho ha'u-nia ferik-oan ami buka balde no basia hodi se ba udan been. Ha'u sente kontente, ha'u agradese tebes ba Governu, tanba bele hetan uma ida hodi ha'u ho ha'u-nia feen bele hamahan-aan ba," dehan Pedro.

Entretantu, Uma Memória ba Esperansa unidade 1 (ida) ho medida metru neen kuadradu, kompostu husi kuartu tolu, sala vizita ida, haris fatin ida no dapur iha parte li’ur ho medida metro 7,5 kuadradu.

Uma Memória ba Esperança nu'udar programa CNC nia, ne'ebé konstrui uza Orsamentu Jeral Estadu ba tinan 2023 ho montante $24,091.86.

Uma ne'e sei utiliza husi benefisiáriu, no proibidu atu transfere ba parte seluk ho forma saída de’it, inklui proibidu sai garantia ba kualkér akordu, formál ka la formál, ho parte ne'ebé de'it.

Benefisiáriu, nu'udar uma-na'in mak sei toma responsabilidade ba halo servisu manutensaun ba Uma Mémoria ba Esperansa ne'ebé atribui husi CNC, inklui halo mundansa ruma bainhira nesesária.

CNC iha poder tomak hodi halo intervensaun bainhira mosu desputa ho terseira parte iha forma saída de'it kona-ba Uma Memória ba Esperança ne'ebé atribui ona ba benefisiáriu sira.