Enkuantu, manorin na’in 75 ne’e mai husi munisipiu 10 mak hanesan, Ainaro, Aileu, Baukau, Bobonaro, Kovalima, Ermera, Manatutu, Vikeke, Lautem, no Manufahi.

Diretór Ezekutivu CNC, Hugu Maria Fernandes hatete, enkontru  ne’e hetan organiza husi Ministeriu Edukasaun Juventude no Desportu no mós Organizasaun Nasoens Unidas ba Edukasaun no Kultura.

Nia hatutan, enkontru ne'e realiza ba dala tolu ona hodi halo diskusaun konaba manual ne'e, ne'ebé partisipa mós husi akedemiku, dosente, no mós diretór eskola sira.

“Ita konvida fila-fali diretor eskola no manorin sira ne'ebé hanorin materia istória atu bele mai fó sira nia hanoin no opiniaun konaba materia ne’ebé sira hanorin ba estudante sira,”” dehan nia ba Jornalista sira iha Salaun Konferensia CNC, Balide, Dili, tersa (30/05).

Iha fatin hanesan, Diretór Jeral Pólitiku Planeamentu, Inkluzaun no impressaun MEJD, Raimundu José Neto hatete, prezensa MEJD nia iha enkontru ne'e importante tebes tanba atu formaliza no legaliza, tanba manorin sira ne'e responsavél Ministeriu Edukasaun nian.

Nia dehan, iha Timor-Leste, ema sei menus atu elebora materia istória no joegrafia ba eskola sira sira, hahú husi ensinu bázika to’o sekundaria.

"Ita nia konteudu kurikulum kona ba Edukasaun istória no Geografia manual ba ensinu Bàsiku seidauk iha tanba ita nia ema menus atu elabora manual ida ne'e, to'o agora atu reforma tan ona kurikulum maibe infelizmete seidauk iha manual," nia esplika.

Iha biban ne'e mos, Manorin husi Eskola EBC no.1 Tirilolo Baukau Januáriu Freitas Brás, agradese ba atividade ne'ebé realiza husi CNC  tanba ho prezensa ne'e sira bele koalia kona ba problema ne'ebé sira hasoru iha eskola liliu kona-ba materia Istória no jeografia.

Tanba manorin sira ne'ebé durante ne'e hanorin materia Istória tuir manual ne'ebé sira hetan, maibé materia hirak ne'e dook liu husi istória Timor nian.