Membru komisaun A Parlamentu Nasionál trata asun Justisa no Konstituisaun ne’e dehan, iha tempu agora la oportunu atu kriminaliza difamasaun.

“Ita kriminaliza uluk mak kazu insestu la’os kriminaliza difamasaun, tanba razaun hanesan ne’e, difamasaun krime ka la krime depende ba ema ida hato’o opiniaun ka halo difamasaun ne’e. Se nia halo difamasaun ho nia prepozitu par hatún ema-nia karater publikamente no hatún ema-nia karáter ho asasinatu, ne’e ita bele dehan sera que ida ne’e razoavel, maibé se karik ema ne’e hato’o buat ida publikamente mais ba hahalok ida ne’ebé ke loos, ezemplu, kuandu jornalista sira hakerek baut ne’ebé mak loos, nia labele ba prosesu kriminal,” dehan Carmelita iha PN, Kinta (18/06).

Tan ne’e, nia afirma, iha tempu agora la oportunu, la nesesariu no laiha razaun atu kriminaliza difamasaun.

“Di’ak liu ita hare no tetu didi’ak lai, tanba ita-nia país Repúblika Demokrátika Timor-Leste, ne’ebé ita tetu didi’ak ita-nia hanoin politka sira hodi sai ba lei ruma,” dehan nia.

Tuir nia, loloos MJ tau prioridade ba kazu sira ne’ebé lao ona Tribunál Rekursu  sira liu-liu kazu insestu, la’os ba lei difamasaun.