Projetu konstrusaun ne’e, sei implementa iha Munisipiu Ainaro Postu Administrativu Maubise no mós Atauro.

"Ohin ita asina kontratu ho Kompañia rua, atu sira bele halo projeitu melloramentu sistema bee moos iha Atauro no iha Ainaro, iha postu maubisi,"dehan Prezidente BTL,EP, Carlos Peloi, iha Edifisiu BTL, Kaikoli, segunda ne'e (12/09).

Nia hatutan, konstrusaun ba projetu melloramentu sistema bee moos iha munisipiu rua refere ho durasaun tempu fulan neen (6).

Nune’e, ba projetu konstrusaun bee moos baMunisipiu atauro tomak ho kustu dolar amerikanu $800.000.

Aleinde, iha Munisipiu Ainaro, Postu Administrativu Maubise kustu ba projeitu ne'e, ho osamentu hamutuk dolar amerikanu $500.000.

Prezidente BTL,EP esplika, iha Munisipiu Atauru, projeitu refere, sei mellora bee matan ezistente berau ho kapasidade 5L/s no instalasaun kanu transmisaun 3km no mós instalasaun kanu distribuisaun 2,3km

Nune'e, instalasaun kanu ba uma sira hamutuk 30km no instalasaun metro kontrador ba uma-kain 792 no unidades serve populasaun hamutuk 4.750.

Enkuantu, iha Munisipiu Ainaro, Postu Administrativu Maubise, sei dada bee ho intake eramatu 5,7 ho total kapasidade 8,9 L/s, no instalasaun transmisaun no distribuisaun hamutuk 21km.

Ho nune’e, instalasaun metro kontrador ba uma kain 340 unidades, serve populasaun 2.040.

Nia dehan, fornesementu bee moos ne’e, sei fahe mós ba iha eskola no postu saúde sira.

Tanba ne'e, Prezidente BTL, hato'o agradese ba kompañia rua ne'ebé ho inisiativa, bele halo konstrusaun ba projeitu refere, nune'e bele fó benefisiu ba komunidade nia nessidade.

Iha fatin hanesan, Reprezentante Kompañia Malaca, Eliziu Qei hateten, Kompañia prontu atu aselera projetu ne’e, tuir tempu ne’ebé determina, bazeia kontratu ne’ebé iha, hodi garante kualidade asesu bee moos ba komunidade sira.