Prezidente Komisaun Ezekutivu, BTL,E.P, Carlos Peloi dos Santos, hatete, kuaze iha teritoriu laran komunidade iha suku, aldeia no munisipiu, barak mak prekupa kona bá bee moos.

Maibé prekupasaun komunidade sira nian, iha ona prosesu nia laran, nune’e BTL,E.P sei rejolve bazeia ba lista hodi halo kanalizasaun bee moos ba suku sira ne’ebé presija.

Nia hatutan, mesmu governu hamutuk ho parseiru internasional sira ajuda investe no impleta projetu sistema bee moos iha fatin-fatin, kuaze 1.600 ba sistema instalasaun iha teritoriu tomak liu-liu iha area rural sira.

Maibé, ida ne’e, nia rekoñese, katak, seidauk sufiente, tanba komunidade kauze 300 resin mak seidauk asesu ba bee moos, inklui aldeia Bilimau Postu administrativu Kailaku, Munisipiu Bobonaru.

"Hau hanoin problema ne'e, sira sei hetan nafatin, maibé presija tempu, tanba ita bazeia ba lista no halo ida pur ida," dehan nia ba Online INDEPENDENTE, iha knar fatin, Kaikoli, kuarta horseik (06/04).

Nia akresenta, BTL.E.P hanesan instituisaun foun, nune’e primeiru sei fokus hela intermus atu estabelese reforsa instituisaun BTL,E.P ne'e rasik, liga ba rekrutamentu staf, no sistema jestaun finansa hodi apoiu halo servisu.

Maibe, aleinde ida ne'e, BTL,EP kontinua promove projetu, tantu iha urbana no rural, tanba iha tinan kotuk BTL, E.P konsegue promove kuaze 17 projetu rural inklui postu balun.

“Entaun, iha tinan ida ne'e BTL,E.P fokus ba projetu 31 iha postu no projetu 21 iha rural hodi implementa bee moos ba komunidade,”tenik nia.

Tanba ne'e, nia dehan, iha tempu besik tekniku sira sei tun ba kada fatin sira atu halo dezeñu biokiu, hafoin lansa projetu sira ne’e.

Entretantu, iha sorin seluk, Komunidade sira iha Bairru Bilimau, Suku Raiheu, Postu Administrativu Kailaku, Munispiu Bobonaro, durante ne’e halerik tebes ba bee moos.

komunidade, Cristiano Marçal Pinto hateten, iha tinan 2018 joventude iha bairru ne’e ho inisiativa ba dada bee moos  husi foho leten, maibé iha tinan kotuk mosu inundasaun hodi estraga tiha manggera ne’e no oras ne’e komunidade susar tebes ba bee moos.

“Kondisaun ida ne’e presiza haree tanba komunidade iha ne’e besik 3.000 mak asesu ba bee moos ne’e, tanba uluk kanu ne’ebé ami liga ne’e agora taka metin ona ho fatuk mesak boot de’it, tanba manggera ne’e dada husi foho mai mota laran depois mak to’o komunidade nia uma,” nia hateten ba Jornalista Independente bainhira lalin bee ba uma, iha Kailaku.

Komunidade ne’ebé hela dook besik kilometru rua ne’e tenki lalin uza gerobak ka selu fali karreta mak lalin, tanba bee ne’e iha tanki, dalaruma kuru to’o atu maran, balun tenki halai ba mota hodi fase roupa.