Prezidente Konsellu Imprensa (KI), Virgilho Guterres hateten, Borja lori fila fali jornalismu ba iha nia fatin tanba jornalista ne'e lian ba lian laek sira.
Nia hato'o asuntu hirak ne'e iha Sentru Nasionál Chega wainhira sai oradór ba semináriu Borja da Costa nia obra ba dezenvolve kultura nasionál. Borja ema ne’ebé halo nia admira maske la konese nia.
"Espiritu Borja nian polítiku, poeta no jornalismu. maibé buat ne'ebé kesi metin nia maka polítiku revolusionáriu, poetiku revolusionáriu, no jornalista revolusionáriu" dehan nia iha Sentru Nasionál Chega,Ohin (13/10).
Nia afirma, Pergunta Borja ninian ne'e pergunta jornalístiku hotu, Foho Ramelau o aas tebes maibé tanba sá mak o nia povu terus ba beibeik, se karik ohin loron mak Borja sei moris nia sei pergunta nafatin tanba sa maka OJE ne'e aas maibé povu ki’ak ba bebeik, Borja lori fila fali jornalismu ba iha nia fatin tanba jornalista maka sai lian ba lian la’ek sira.
Iha sorin seluk belun di'ak no kámara saudozu Borja da Costa, Dr. Roque Rodrigues husu ba jerasaun foun sira atu le’e fila fali obra sira husi Borja da Costa nian atu bele koñese passadu hodi bele lori Timor ba oin.
"Se la koñese ita nia passadu ita sei hakat ho matan ne'ebé taka, se hakarak atu hakat ba futuru ita tenke hatene ita nia passadu no atu hatene ita nia passadu ita tenke le’e fila fali poezia sira husi Borja nian atu bele manán futuru." Hakotu nia.
