Nia dehan, tuir dadus ne’ebé hahú submete ba iha MEJD, total benifisiariu ba bolsa méritu hamutuk 13.517, maibé hafoin MEJD halo verifikasaun, benifisiariu ne'ebé prense kriteriu no hetan aprova final mak iha 12.927 benifisiariu.

Enkuantu, husi númeru ne’e, estudante mai husi ensinu báziku to'o sekundária.

Ho nune’e, total orsamentu ne'ebé aloka ba bolsa méritu ho montante hamutuk dolar amerikanu $7.517.100.

Total husi dadus ne'e estudante hamutuk 7.593 ho ekivalen 59% mak loke ona konta bankaria no 5.334 no ekivelente 41% seidauk loke konta bankaria.

"Husi 7.593 benifisiariu ne'ebé loke ona konta bankaria ne'e iha 5.190 no ekivalen 69% MEJD verifika hotu no entrega ona BNCTL iha loron 09 fulan-Maiu 2023 hodi hahú halo ona transferensia osan ba ida-idak nia konta bankaria,”dehan nia liu husi konferensia imprensa iha salaun VIP-MEJD, Vila-Verde, sesta (19/05).

Ministru hatutan, benifisiariu 2.403 ekivalente 39%, MEJD sei verifikla no semana oin sei haruka ba BNCTL.

Ministru akresenta, ba benifisiariu sira ne'ebé seidauk loke konta bankaria, tanba estudante balun ninia dokumentus hanesan sertidaun moris no bileti identidade seidauk iha.

Aleinde, estudante balun mós sira nia tinan menus husi 16 mai kraik no barak mak inan-aman nia dokumentus seidauk kompletu, tanba ne’e difikulta tebes sira atu loke konta bankaria hodi asesu ba bolsa méritu. Nune’e, mós estudante balun inan-aman mate hotu ona.

Entretantu, atu hatan ba kestaun hirak ne’e, MEJD hamutuk ho BNCTL nafatin kordena malu atu buka solusaun ba estudante hirak ne’e.

Tanba ne’e, MEJD husu Diretora Munisipais, Diretor eskola no ba inan-aman sira ne'ebé oan sira nia naran iha lista benifisiariu atu halo aproximasaun hodi loke sira nia konta bankaria.

Tanba loron ikus ba loke konta bankaria mak iha 31 Jullu 2023, benifisiariu sei lakon direitu tomak hodi simu osan ne'e bainhira la uza tempo ne'e ho di'ak hodi loke konta bankaria.