Tuir komunikadu ne'ebé Online INDEPENDENTE, asesu iha pajina BNCTL, ralata, iha loron 24 outobru tinan ne'e, BNCTL mós asina ona akordu ho Ministeriu Soliedariedade Sosial no Inkluzaun (MSSI) hodi realiza implementasaun pagamentu fim do ano ba uma -kain hotu iha Timot-Leste.
Konteúdu husi akordu ne’e, relasiona ho implementasaun subsidiu fin do anu $ 200, ba uma-kain hotu, ne’ebé tuir planu atu hahú iha inisiu fulan Novembru tinan ne’e.
"Objetivu prinsipál husi asina akordu ida ne’e, hodi selebra kooperasaun entre MSSI ho BNCTL, tanba BNCTL hanesan Banku Nasionál Komérsiu Timor-Leste nian, ne’ebé sei transporta osan Subsídiu Fin du Anu ne’e husi nasionál ba to’o iha Postu Administrativu ida-idak, hafoin ekipa pagamentu ho Xefe Suku sira sei ba foti osan iha Postu Administrativu, hodi ba iha suku sira hotu iha Timor-Leste, hafoin benefisiariu ida-idak sei ba foti osan ne’e iha ida-idak nia suku," dehan Diretór Jerál Administrasaun no Finansas MSSI, Rui Manuel Gago Exposto, liu hosi komunikadu ne'ebé Online INDEPENDENTE asesu, tersa ne’e (25/10).
Entretantu, CEO BNCTL, Brigido de Sousa hateten, sei laiha problema ba BNCTL atu transporta osan ba benefisiariu sira, tanba transportasaun osan sei to’o deit iha kada Postu Administrativu.
“hanesan uluk ami halo tiha ona pagamentu ba agregadus famíliares iha tinan 2020. Nune’e ha’u espera katak ho esperiensia ne’ebé ita iha ho MSSI, buat hotu sei la’o ho diak,” dehan Brigido.
Nia hatutan, dokumentus hirak ne’ebé kada benefisiáriu sei uza hodi ba foti subsídiu ne’e mak hanesan, Bilete Identidade ne’ebé bele kompostu husi Ficha Família, Kartaun BI, Kartaun Eleitoral ka Pasaporte.
"BNCTL sei disponibiliza nia rekursu hanesan bankaria moveis no funsionarius to'o iha postu administartivu 67 atu halo pagamentu subsidiu ba suku 450, nune'e xefe suku sira mak sei halo pagamentu direita ba benefisiariu iha suku no aldeias sira," nia haktuir.
Tuir nia, BNCTL nu'udar banku estatal no Uniku Banko Nasional Timor-Leste, ninia kompremetidu atu disponibiliza servisu bankaria ba komunidade sira iha area rurais no urbana iha territoriu Nasional.
Enkuantu, BNCTL mós sei apoiu no fasilita programa governu nian ba bem estar komunidade nian.
Entretantu, tuir dadus hosi Ministériu Soliedariedade Sosial no Inkluzaun (MSSI) total benefisiariu ba subsidiu ne'e hamutuk 339.110 ho orsamentu alokadu purvolta dolar amerikanu tokon U$67.8
