Ministru Turismu Komérsiu no Indústria, José Lucas do Carmo da Silva,hatete, nia parte husu ba grupu benefisiáriu atu utiliza fundu ne’e ho di’ak hodi rekopera átividade.
“Programa rekoperasaun ne’e ita halo atu istimula fali na’in hira nia átividade hanesan baibain depois hetan perturbasaun husi Pandemia COVID-19 ho kalamidade, maske laos fundu boot liu maibé ida ne’e atu hakmaan ita-boot sira-nia átividade iha turismu, ospitalidade no artezenatu ne’ebé asosia ho setor turismu. Tanba ne’e hakarak fó hatene ba benefisiáriu sira hotu atu partisipa ativu liután konaba prosesu dezenvolvementu ba rekoperasaun ekonomia,” Ministru," dehan nia iha salaun MTKI, Farol, tersa ne’e (25/10).
Nia hatutan, ba benifisiariu sira atu iha responsabilidade ba fundus ne’e.
“Husu ita-boot sira (grupu benefisiáriu-red) atu iha akuntabilidade no responsabilidade ba fundu ne’e, tanba ita iha regras relasiona ho fundu transferensia públika. Tanba ne’e hatoman-an ba atu ita hotu satisfas ho relatoriu ba fundu refere,” nia informa.
Iha fatin hanesan, Vise-Ministra Turismu Komunitáriu Kultural, Inácia da Conceição Teixeira hatete, fundus ne’e atu suporta hodi rekupera no normaliza átividade Mikro Pequena Media Empreza iha setor turismu no ospitalidade ne’ebé afeta husi situasaun Pandemia Covid 19 no kalamidade ne’ebé fó estragus maka’as ba operadór turístiku no atividade turismu sira.
Nune'e, nia parte agradese tebes ba ekipa nia esforsu hodi halo verifikasaun ba proposta husi grupu benefisiáriu sira husi Munisípiu kona-ba fundu planu rekoperasaun ekonomia liuliu iha Mikro Pequena Media Empreza iha setor turizmu.
Nia hateten, proposta husi Munisípiu 13 no RAEOA hamutuk 15.000 ba iha diresaun rua iha area turismu, Artezenatu ho Grupu Kreativu, Sítiu turistiku no Street food tunu sate. Ekipa tékniku verifika balun mak pasa no balu lapasa.
Entretantu, Benefisiáriu João Amaral ne’ebé jere Turizmu Komunitáriu MALIKEO senti kontenti no agradese bele hetan fundus husi Ministériu Turismu Komérsiu no Indústria
“ida ne’e programa oitavu governu nian ne’ebé fasilita emprezariu sira iha Timor, oinsa atu hakmaan emprezariu sira, tanba foin lais covid ho tan dezastre ne’ebé akontese tinan hira liu ba, impaktu tebes ba negósiu ne’ebé lao liu-liu iha área turismu, ha'u hanoin ida ne’e fasilita no apoiu tebes ba emprezariu sira ne’ebé jere sitiu turistiku sira, proposta ne’ebé ami haruka mai ami husu 48,000 mil maibe apoiu ami hetan 3.000 ,” nia relata.
Entretantu, implementasaun Fundus Planu Rekoperasaun Ekonomia apoiu ba Mirko Pequena no Media Empreza, fudamenta husi Rezolusaun Governu N.º 18/2020 de 10 de Juñu kona-ba “Cria a Comissão para a Elaboração do Plano de Recuperação” liu hosi reuniaun Konsellu Ministru altera Dekretu Lei nú. 48/2020, de 7 de Outubro, ne’ebé “Adota medida apoiu ba família mediante atribui “Cesta Básica” no ba operadór ekonómiku lokál sira iha ámbitu Planu Rekuperasaun Ekonómika.
Ho nune'e, MTKI prevé orsamentu planu rekuperasaun ekonomia hodi Apoiu Mikro Pequena no Media Empreza Turismu ba Diresaun Nasionál (2): Diresaun Nasionál Dezenvolvimentu Turístiku ho montante $ 270,000.000 no Diresaun Nasionál Empreendimentos, Atividade no Produtu Turistiku ho montante $ 1,795.000.00
Enkuantu, fundus ne’e apoiu direita husi husi Diresaun Jeral Turismu Gabinete Vise-Ministra hodi rekupera no normaliza átividade Mikro Pekquena no Media Empreza iha setor turismu iha munisípiu 13 no RAEOA.
Aleinde, Governu nia polítika ida oinsá atu rekopera ekonomia depois Timor-Leste afeita pandemia COVID-19 no kalamidade públiku ne’ebé akontese fó impaktu maka’as ba iha area turismu.
Ho nune'e, MTKI liu-husi diresaun ne’ebé tutela iha Vise-Ministra Turismu, Komunitáriu no Kultural, hala’o avaliasaun no deside fó asisténsia ba benefisiáriu fundus Planu Rekoperasaun ekonomia Apoiu Mikro Pequena Media Empreza mak hanesan tuir mai ne’e: grupu Artezenatu 143, sitíu turistika 21, street food 500 ho totál 66.
Serimónia asina kontratu ne’e prejidi husi Ministru Turismu, Komérsiu no Indústria José Lucas do Carmo da Silva, akompaña husi Vise-Ministra Turismu, Komunitáriu no Kultural Inácia da Conceição Teixeira no kargu xefia sira.
