Xefe estadu hateten, iha Dekretu Lei subsidiu uma-ka’in iha ona meza leten, maibé nia prefere liu utiliza lei anteriór ne’ebé implementa iha tempu pandemia Covid-19, tanba lei anteriór ne’ebé governu halo ne’e mak di’ak loos.

“Subsidiu ne’e fó de’it ba uma-ka’in sira ne’ebé ki’ak liu ka vulnerável loos, lalika fó ba hotu-hotu ida ne’e mak loos. Ha’u sei halo reflesaun didi’ak no sei ko’alia fila fali ho reprezentate povu iha uma fukun Parlamentu Nasionál atu haree hikas Dekretu Lei ne’e,” dehan nia ba jornalista Sira iha Kuartél Jenerál F-FDTL Fatuhada, tersa,(25/10).

Nia hatutan, iha situasaun difísil buka ajuda dala ida tán populasaun, tanba ne’e tenke buka ajuda duni populasaun lalika ba tán sira ne’ebé iha empregu no vensimentu di’ak hela.

Enkuantu, Prezidente Repúblika seidauk iha desizaun finál ba Dekretu Lei ida-ne’e atu veta ka promulga, maibé nafatin husu atu subsídiu ne’e fó liu prioridade ba família sira vulnerável.

Entretantu, molok ne'e, iha loron 05 fulan Outubru, Konsellu Ministru (KM) aprova projetu Dekretu-Lei ba alterasaun dahuluk Dekretu-Lei nú. 37/2022, loron 25 fulan-maiu, kona-bá subsídiu fim do ano ba uma-ka’in sira ho valor $200, ne’ebé aprezenta hosi Ministra Solidariedade Sosiál no Inkluzaun (MSSI) Armanda Berta dos Santos.

Tan ne’e, Portavos Governu liu hosi Ministru Prezidénsia Konsellu Ministru (MPKM) Fidelis Manuel Leite Magalhães hateten, membru governu ne'ebe lidera hosi Primeiru Ministru, Taur Matan Ruak Sira desidi ona sei la simu subsidiu Uma-Kain fin do ano ho montante dolar amerikanu $200.

“Membru Governu sira deside ona katak sira la presiza ba simu subsídiu $200, Ha’u ko’alia rasik ho Primeiru-Ministru no Vise Primeiru-Ministru na’in-rua katak hotu-hotu halo desizaun hodi kontribui hamutuk hodi fó ba hirak ne’ebé presiza liu", dehan nia iha Palasiu Governu, kuarta (05/10).