Eleisaun direita no sekretu ne’e hatudu rejultadu final Aderito Hugo Hetan votus 32 no actual presidente parlamentu nasional Aniceto Guterres 33, tuir lolos husi CNRT no PLP nia votus hamutuk 30 no bloku koligasaun FRETILIN, PD no KHUNTO hamutuk 35 maibe realidade rejultadu hatudu oin seluk.

Tanba ne’e, tuir observadór politika husi Universidade Nasional Timor-Lorosa’e (UNTL), Camilio Ximenes hatete, Parlamentu Nasionál mak sai hanesan forsa politika governu nian hodi garantia governativa ne’ebé estavel no dura tuir mandatu konstitusionál tinan lima.

Observadór ne’e duvida ona ba Bloku Koaligasaun, maske bloku ne’e harii ona husi partidu tolu ne’e maibe politika ne’e dinamika to’o tempu ida bele muda aan tuir situasaun politika tanba realidade esperensia hatudu ona iha periode balun nia laran.

“Hau hanoin VIII governu ne’e bele mosu iha periode tinan lima ne’e nia laran tanba sira laiha loialidade ba malu no ita haree vigansa politika mós balu iha tanba ne’e FRETILIN tenke halo servisu barak hodi kontinua halo dialogu ho partidu sira seluk,”dehan Camilio iha kampus Mean UNTL Kaikoli horseik.

Nia hatutan iha periode tinan hira ona maibe kada periode partidu ida la konsege manan maioria absoluta tanba ne’e kuandu partidu ida iha eleisaun manan maioria simples hakarak ka lakoi kria bloku koligasaun hodi ukun hamutuk.

Maibé kuandu hanesan ne’e, partidu iha bloku nia idiolojia politika no programa tenke semelante no fahe kadeira ministerial tenke igual.

Atu nune’e, partidu iha bloku ne’e bele satisfas hodi hatudu loialidade ba governasaun Bloku Koligasaun nian.

Maibé iha fatin ketak, Sekretáriu Jerál Partidu FRETILIN, Mari Alkatiri hatete, Bloku Koaligasaun VII governu ne’e la dura povu mak sofre tanba partidu politika sira ne’e halo politika tuir sira nia hakarak.

Nia dehan, durante tinan 10 nia laran, partidu FRETILIN koopera di’ak tebes fó apoiu ba governu tanba intrese nasaun ho povu nian, maibé agora tempu FRETILIN ukun, sira la fó apoiu.

Situasaun ne’e povu tenki haree, katak FRETILIN ukun sira la fó apoiu.

Maibé nia fiar katak rejultadu eleisaun presidente parlamentu nasionál sei la afeita ba governasaun. Nia garantia nafatin sustentabilidade governativa husi bloku koligasaun ne’e.

“Ohin ne’e vota individual tanba ne’e sira vota ba A ka B maibe kuandu vota ba programa no orsamentu ne’e oin seluk ona,” ehan Alkatiri iha parlamentu nasional.