Nia kompromete iha kuartu lejislatura periodu 2017-2022 ne’e sei deskute no aprova lalais lei anti korupsaun hodi fasilita Sistema Judisiariu sira atu kombate korupsaun iha TL.

Iha lejislatura datolu, nia dehan, proposta lei anti korupsaun submete ona ba meza Parlamentu Nasionál, maibé la konsege ajenda hodi deskute no aprova.

“Ha’u husu inisitiva husi Bankada Parlamentár no Deputadu sira liliu Governu atu hamutuk deskute no aprova lalais lei anti korupsaun,”dehan nia iha Parlamentu Nasionál, horisehik.

Maski, Prezidente PN ne’e afirma, komposisaun meza Parlamentu Nasionál, lideres Bankada no lideres komisaun espesializada Parlamentu Nasionál seidauk estabelese hotu, maibé lejistatura da-haat ne’e fó perioridade ba lei sira ne’ebé seidauk deskute no aprova iha lejislatura da-tolu.

“Parlamentu Nasionál ne’e fó perioridade ba lejislatura no fiskalizasaun sira atu deputadu sira labele hein de’it iha kobe house,”nia promote. 

Antes ne’e, iha lezislatura datoluk Parlamentu Nasionál ne’ebé lidera husi eis Prezidente Parlamentu Nasionál Aderito Hugo da Costa kompromete dala barak atu deskute no aprova Lei Anti Korupsaun, maibé la konsege aprova.

Entretantu,Komisaun Anti Korupsaun (KAK), Sosiedade sivíl no públiku ezijé ba Parlamentu Nasionál lejislatura datolu atu halo ajenda hodi deskute no aprova lei anti korrupsaun hodi fasilita servisu KAK iha área investigasaun.