"Ha'u ko'alia ekipa George Soros no ko'alia ho entidade ONU sira seluk, ekipa George Soro nian sira sei haree, tanba sira-nia tradisaun uluk kedas, sira-nia polítika uluk kedas apoia free média demokrásia. Ha'u husu favor atu atensaun ba Timor-Leste, tanba ha'u hatete ba sira Timor Leste, enkuantu ami nia demokrásia la'ós di'ak loos, la presiza apoiu ba Timor nia demokrásia," dehan nia, iha Aeroportu Internasionál Nicolaun Lobato, Komoro, horisehik.
Nia dehan, média privadu iha Timor Leste free loos, nune'e bele fó tulun ba sira relasióna ho ekipamentu jornalizmu atu bele fasilita sira nia atividade loro-loron.
"Portantu lalika halo workshop ka training ba jornalista sira, tanba sira training barak loos ona iha tinan barak nia laran, sira presija mak ekipamentus, hahán, osan," hatete nia.
Nia haktuir, di'ak liu média atu independente iha Timor, favor apoiu osan ruma atu sira bele funsiona loloos sira-nia profisaun iha vida jornalizmu.
Ne'eduni, la'ós agora de'it maibé durante eleisaun, Covid-19 hanesan apoiu natoon ne'ebé husi Uniaun Europeia fó ba média sira ho osan liu husi Embaixadór Uniaun Europeia halo ona.
"Ha'u mak ko'alia ho Embaixadór Uniaun Europeia, depois sira tau osan balun, purtantu ne'e lá'os agora de'it, maibé kontinua ho parseiru sira atu favor tau matan ba média independente," haktuir nia.
Xefe Estadu foka liu ba média privadu, tanba RTTL iha orsamentu estadu nian, ho nune'e Palasiu Prezidensiál atu apoia nafatin ba Governu apoiu ruma ba empreza públiku, labele buat hotu-hotu husu ba governu, tanba ne'e mak iha nia mandatu durante Xefe Estadu husu nafatin rai seluk, país parseiru sira atu kontribui ba governu hodi kmaan Orsamentu Jerál Estadu.
Molok ne'e, Prezidente Repúblika, José Ramos-Horta, hala’o enkontru ho Billionáriu Amerikanu, ne’ebé na’in ba fundasaun Open Society Foundation, George Soros iha Estadu Unidus Amérika ho objetivu atu husu apoiu ba mídia privada iha Timor Leste
Tuir Xefe Estadu, Na’in ba Open Society Foundation, George Soros hanesan Billionáriu ho idade tinan 90-resin ona, maibé iha kondisaun saúde di’ak, nomos iha influénsia iha mundu.
Prezidente Horta dehan, delegasaun husi Open Society Foundation vizita ona Timor, hodi diskuti hamutuk programa espesiál ne’ebé fundasaun ne’e atu implementa, liu-liu feto iha negósiu, mídia no demokrasia iha mundu.
“Ha’u sei haree oinsá sira bele apoia mídia iha Timor-Leste, mais ha’u lakohi rona apoiu kona-ba “training”, tanba halo ‘training” tinan lubuk nia laran, ha’u hakarak haree apoiu konkretu ba mídia mak saida?, Favór tau osan ruma apoiu ba ekipamentu apoiu ba sede infraestrutura mídia sira-nian buat sira-ne’e. Portantu, buat barak ha’u sei ko’alia ho sira par haree oinsá señór George Soros bele apoia Timor-Leste makas liu,” hatete Xefe Estadu.
Nia dehan, Open Society Foundation hakarak apoia hadi’a infraestrutura husi instituisaun mídia privada sira.
“Klaru apoia ne’ebé ha’u buka ba mídia privadu, tanba mídia governu hanesan RTTL no seluk tan ne’e governu iha orsamentu, preokupasaun númeru 1 ba mídia privada, sira ne’ebé kleur ona hatudu sira-nia komitmentu mídia privada ne’ebé ho sira-nia rekursu rasik ho difikuldades ne’e inklui mós online para apoia mós online. Ba mídia privadu, ha’u buka atu apoiu husi governu ou fundasoens iha li’ur par ita-nia jornalista sira bele iha ekipamentu, iha infraestrutura ne’ebé di’ak liu par sira bele dezenvolve,” deklara Xefe Estadu.
Prezidente PR Horta mos prontu atu buka apoiu ba nasaun seluk hanesan Korreia no seluk tan, hodi apoia mídia estatal hanesan RTTL.Ep, maibé kestaun ne’e tenke koordena ho governu, tamba instituisaun mídia iha papel importante hodi habelar informasaun.
Molok hala’o enkontru ho Na’in Open Society Foundation, Xefe Estadu sorumutu uluk ho Geroge Soros nia oan mane Alex Soros hamutuk ho eis Vise Primeiru-Ministru Inglaterra atuál CEO Open Society Foundation hodi ko’alia kona-ba ajenda enkontru ho George Sorus nian.
