“Subsidiu $200 ne’e, atu ajuda ba ema sira ne'ebé iha situasaun difisil ka vulneravel, ne'e mak dehan subsidiu, tanba subsidu ne'e ajuda husi estadu ba ema ne'ebé susar, agora membru Governu moris susar hotu ka?, hahan laiha ka?, tenke ba hadau ema povu babain ninia direitu," dehan ba jornalista sira iha edifisiu CNC, Balidi, kinta horseik (29/09).

Ezekutivu ne’e hatutan, Governu liu husi reuniaun Konsellu Ministrus iha loron 28 fulan-Setembru tinan ne’e, ne’ebé aprova ona dekretu lei, hodi deside uma-kain hotu sei hetan subsidiu $200, tan ne’e AJAR konsidera hanesan politika korupsaun ida.

"Mai ha'u konsidera katak, ne'e korupsaun politika, Governu agora ne'e korupsaun, sira desidi rasik hasa'e salariu bo'ot ba sira nia aan rasik, depois povu ninia direitu mós sira ba hadau hotu,"nia relata.

Nia dehan, membru Governu sira simu ona salariu desimu terseiru, agora sira simu tan subsidiu. Ida ne’e hamosu diskriminasaun sosial hodi aumenta inflasaun iha nasaun ne'e.

Iha sorin seluk, Prezidente José Ramos Horta, hatete, subsidiu anuál uma kain nian, di'ak liu fó komunidade sira ne'ebé laiha servisu no la hetan rendimentu.

"Subsidiu 200 ne'e di'ak liu fó de'it ba komunidade ne'ebé empregu laiha ka sira-nia vensimentu ne'e kiik loos, ne'e solusaun ida. Solusaun seluk, ita ida-idak ho ita nia konxiénsia fó osan ne'e ita fó tun ba sira ne'ebé osan laiha," dehan nia, iha Aeroportu Internasionál Nicolau Lobato, Komoro, horisehik.

Molok ne'e, Governu liuhusi reuniaun Konsellu Ministru iha Kuarta (28/9) aprova ona projetu Dekretu-Lei, numeru  37/2022, kona-ba fó subsídiu US$ 200 ba uma-ka’in sira iha fulan-Dezembru.

Desizaun hodi atribui subsídiu ba uma-ka’in sira hotu, ne’ebe halo ona rejistu to’o loron 28 fulan-Fevereiru 2022, independentemente husi sira iha situasaun vulneravel ka lae nomos ka husi sira iha membru balu ne’ebe fó atividade profisionál iha ámbitu administrasaun públika nian ka lae.

Tuir dadus husi Ministériu Adminitrasaun Estatál (MAE) submete ona uma ka’in hamutuk  39.110 ba Mnistériu Solidariedade Sosiál no Inkluzaun (MSSI) ho nia osan ne’ebé prevee  mak tokon US$ 700. Subsídiu ne’e universalmente katak, uma ka’in hotu-hotu iha territóriu nasionál sei hetan subsídiu ne’e.

Entretantu, iha dekretu-lei 37/2022, kona-ba (Subsidiu de Fim de Ano Aos Uma Ka'in) iha artigu 1 alinea 2 ne’e hateten, subsidiu fim do ano ba uma-ka’in ne’ebé mak vulneravel liu iha Timor-Leste.

Dekretu-lei ne’ebé hanesan, iha fali artigu 2 ne’e, haktuir benefisiáriu ba subsídiu anuál ne’e ba uma-ka’in sira-ne’ebé rejistu ona no iha “Livru Rejistu Uma Ka’in” iha suku ida iha territóriu nasionál previstu ona iha Diploma Ministeriál Númeru 49/2017.

Tuir Planu iha loron 16 Novembru 2022, sei lansa subsídiu fim do ano US$ 200 ba uma-ka'in.