Benefisiáriu Na’in 60 Partisipa Formasaun Feto iha Direitu foti Desizaun Ekonomia Família Featured

By Ivonia Varela Fevereiru 08, 2024 726
Hafoin remata forum nasional, partisipante sira foto hamutuk ho Sekretariu Estadu Igualdade, iha Salaun Tower Fatuhada, Dili, (08/02/24). Foto:INDEPENDENTE. Hafoin remata forum nasional, partisipante sira foto hamutuk ho Sekretariu Estadu Igualdade, iha Salaun Tower Fatuhada, Dili, (08/02/24). Foto:INDEPENDENTE.

DILI: Benifisiáriu husi Programa Feto Lidera Covid-19 Liu Husi Damen no Dezenvolvimentu Ekonomia hamutuk na’in 60 partisipa formasaun kona-ba feto iha direitu atu foti desizaun ba ekonomia familia.

Diretóra Ezekutiva ONG Ba Futuru, Judith Maria de Sousa hatete, benefisiáriu hamutuk na’in 60 kompostu husi munisípiu Covalima na’in 30 no Ermera na’in 30 partisipa formasaun husi Organizasaun Noun Governamentál ba Futuru kona-ba ba disiplina pozitivu protesaun ba labarik igualdade jéneru, liliu liga ba oinsá atu rai osan.
“Iha ami-nia aktividade ida ne’e ami fornese informasaun ba inan feton sira ne’e ho tópiku oioin inklui mós ba iha disiplina pozitivu, protesaun ba labarik nia nomos ami-nia formasaun ida liga liu ba oinsá atu rai osan no buka kooperativa sira atu impresta osan hodi bele halo sira nia negósiu,” dehan Diretóra Ezekutiva iha salaun Tower Fatuhada, Kinta (08/02).
Nia dehan, benifisiáriu husi programa feto lidera Covid-19 liu husi damen no dezenvolvimentu ekonomia durante tinan tolu programa ne’e la’o no susesu ona iha Munisípiu Covalima ho Ermera.

Iha fatin hanesan, reprezentante Organizasaun Misereor iha Timor-Leste, Inge Lempp senti kontente, tanba sai parseiru ho ONG Lokál ba Futuru hodi servisu hamutuk benefisiáriu sira husi munisípiu rua hodi fornese treinamentu inovativu no kreativu durante tinan ida.
“Ba ita sira ne’ebé mai husi munispiu Ermera Ho Covalima ne’ebé partisipa ona iha programa ida ne’e, maibé ita sira hahú tiha ona pasu primeiru sira, ita boot sira iha dalan ba mudansa ona. Espera oportunidade ohin ho forum nasional ida ne’e bele loke ideias foun haforsa ita-nia hirus no korajem atu hakat ba pasu tuir mai,” nia afirma.
Tan ne’e treinamentu ne’e simu sira ona mak hanesan, haforsa ekonomia feto, rezolusaun konflitu, prevensaun violensia bazeia ba jeneru, rai no impresta osan, organiza forum nível munispiu no kompetensia planu negosiu inovativu.
Iha biban ne’e Sekretariu Estadu Igualdade Elvina Sousa Carvalho hatete, programa sira ne’ebé benifsiariu sira halo fó tebes benifísiu no inspira ba feto maluk sira hodi bele jere ekonomia familia nian.
Nia dehan, sekretariu estadu reprezenta governu hato’o apresiasaun ba ONG ba Futuru no ekipa tomak ne’ebé mak kompleta servisu governu nia atu bele fó oportunidade hodi inspira feto maluk sira iha vida ekonomia nian.

Rate this item
(0 votes)
Last modified on Kinta, 08 Fevereiru 2024 20:33

Independente Digital TV