Governadór Banku Sentral Timor Leste (BCTL), Abrão Vasconcelhos informa, durante ne’e kada tinan osan lubuk ida mak sempre sai husi Timor Leste.

“Transferensia ba li’ur ita sempre barak. Ita tenke selu sasán ne'ebé ita importa, servisu ne'ebé ita útiliza husi li'ur. Entaun osan ne'ebé transfere ba li'ur haree estatistika BCTL públika indika montante ne'e sempre nunka menus billaun $1 tinan-tinan,” dehan Abrão hafoin partisipa konferênsia ho tema ‘Dezenvolvimentu Sistema Finanseira ba Kresimentu’ ne’ebé hala’o iha salaun Otel Novu Turizmu, Lesidere, Kinta (10/08).

Tuir Abrão, ida ne’e buat ida ne’ebé normal tanba Timor Leste kuaze la produs buat ida. Tan ne’e tenke hasai osan hodi selu sasan ne’ebé importa.

“Ne’e laos buat ida la normál, normál tanba ita la produs kuaze buat ida. Tanba naturalmente tenke selu ba sasan sira ne'ebé importa, entaun osan sai ne'e bele mais billaun $1 iha 2022,” nia informa.

Halakon Osan Tahan $1 no $5

Banku Sentral Timor Leste finze hapara sirkulasaun osan tahan $1 no $5 hodi bele promove sirkulasaun osan sentavus iha Timor Leste.

Governadór Banku Sentral Timor Leste (BCTL), Abrão Vasconcelhos hatete, durante ne’e sirkulasaun osan tahan $1 no $5 ladun iha, tanba BCTL hakarak halakon duni osan tahan refere.

"Ita haree agora daudaun sirkulasaun $5 dollar ladún iha ona, BCTL hakarak halakon duni  $1 no $5 dollar ne'e. BCTL la hatama osan ida ne'e,”

Tan ne’e, nia husu atu hatoman an utiliza osan sentavus.

“Ita-boot sira tenke toman uza sen sentavus, duzentus sentavus, tanba ita hakarak promove sentavus, sirkulasaun iha ekonómia,” dehan Abrão.

Aleinde hakarak promove sirkulasaun osan sentavus, nia dehan, kustu transporta $1 no $5 mós boot tebes.

Tan ne’e, BCTL hanoin hodi troka $1 no $5 dollar ho sentavus.

“Imi sira ne'ebé hetan $1 no $5 dollar foun karik haree ba rai didi'ak, koleksi, aban-bainrua, tinan 10 mai, dehan perna kaer osan ida ne'e.”