Hahalok simu envelope inklui prezente oin-oin hanesan sosa karreta no ajuda halo uma ba membru governu no diretór sira, inklui prepara billete aviaun ba pasiar iha rai li'ur hodi goza no toba iha otél lixu no fasilidade seluk tan….,sai problema boot ida ne’ebé akontese iha Timor-Leste hodi dada membru governu ba hataan tribunál too sai vítima hodi tama komarka.

Atu prevene jestaun aat ne’e labele akontese hodi hafo'er naran di’ak VIII Governu Konstitusionál, Primeiru Ministru, Taur Matan Ruak husu no bandu membru governu, diretór no funsionáriu sira sira  labele simu kualkér prezente husi setór privadu ka grupu individu sira.

Taur dehan, nia hatene klaru istória aat barak ne’ebé akontese iha governasaun nia laran, tanba ne’e alerta ba membru governu sira atu labele monu ba sala hodi hafo'er naran di’ak governu.

“Bainhira membru governu sira mak simu arranju ruma iha ninia ministériu tenki hetan koñesimentu husi diretór jerál nune’e entrega ba apoia solidariedade ba kbiit laek sira,” dehan Ministru Reforma Lejizlativa Asuntu Parlamentár (MRLAP), Fidelis Leite Magalhães ba jornalista iha ninia knaar fatin Palasiu Governu Dili foin lalais ne’e.

Fidelis esplika, se membru governu balun simu prezente ruma husi grupu ka emprezáriu ruma labele liu valór $250 (dolar atus rua lima nulu), bainhira membru governu mak simu sasán ho kuantidade boot tenki deklara ba Xefe Governu nune’e hetan re koñesimentu husi Konsellu Ministru.

Ministru hatutan, avizu ne’e Xefe Governu Taur hato’o maka membru governu sira la kumpre, nu’udar PM Taur sei fó sansaun demite nia kargu.

Ministru dehan, PM Taur husu atu membru Governu labele simu billete ba pasiar iha rai li'ur, bandu labele simu karreta luxu, no hela otél gratuita.  Tanba membru governu sira hala’o serbisu estadu nian tenki uza osan estadu hodi labele prejudika ba sira nia servisu profisionál no naran di’ak no dignidade umanu.