Enkuantu, valór nominál $100,7 milhões ne’e ultrapassa koleksaun reseitas Aduaneira iha tinan 2021 ho montante totál $67,9 milhões.
“Fontes reseitas maioria mai husi pontu entrada sira hanesan portu, aeroportu, fronteira terrestres Batugade no Salele,”Online INDEPENDENTE sita iha Komunikadu, tersa (03/01).
Ho mudansa operasaun husi Portu Díli ba iha Portu Tibar, fó kondisaun servisus ne'ebé di’ak liután ba Autoridade Aduaneira hodi bele kontribui hasa’e reseitas doméstika mai kofre Estadu hodi redus dependénsia ba Fundu Minarai.
Iha OJE 2023 ne’ebé hetan ona aprovasaun husi Parlamentu Nasionál no promulgasaun husi Prezidente Repúblika, José Ramos-Horta, Governu sei introdus impostu seletivu konsumu foun ne’ebé inklui, 10% impostu ba karreta ho valór liu US $10.000, 20% ba karreta ho valór liu US $25.000, 30% ba karreta ho valór liu US $50.000.
Aleinde, aumentu iha impostu konsumu ba tabaku no produtu tabaku seluk husi US $50 kada kilograma sa’e ba US $100 kada kilograma, impostu konsumu foun US $1.00 kada kilograma ba masi-midar no Introdusaun impostu konsumu foun ho valór US $3 kada litru ba bebida asukarada (Fanta, Coca-Cola, Sunkist, Sprite no sst). Polítika ida-ne’e Governu trasa atu proteje sidadaun sira nia saúde públiku.
Entretantu, Governu mós sei hasa’e impostu importasaun husi 2,5% ba 5%.
Ho introdusaun impostu hirak ne’e, tuir projesaun reseitas doméstika sei sa’e to’o $174,9 milhões iha 2023.
Introdusaun impostu hirak ne’e mós sai nu’udar instrumentu fiskál ida ne’ebé Governu uza hodi hasa’e koleksaun reseitas doméstika iha futuru hodi redús dependénsia ba Fundu Minarai.
