Kordenador Forsa-Tarefa ba Prevensaun no Mitigasaun Surtu Covid-19 informa, ohin loron 16 fulan-marsu 2021, deteta tan kazu foun na’in 5, sira na’in 2 iha sintomatiku no na’in 3 laiha sintomas. Kazu positivu hirak ne’e kompostu husi mane na’in 2 no feto na’in 3. Kazu konfirmadu ne’e ho idade tinan 11 iha ema na’in ida, idade entre tinan 32 to’o 42 hamutuk na’in 4.
Nune’e husi loron 1 fulan-janeiro 2021 mai to’o agora, iha 11% husi kazu detetadu mak hatudu sintomas, maibé sintomas ne’ebé lijeiru no seidauk iha ema ida mak presiza oksizéniu ka suporte respiratóriu seluk. Kazu foun 5 ne’e, iha hotu Munisipiu Dili, ho detalles hanesan tuir mai:
a). Kazu positivu 1, husi Aldeia Terra Santa, Suku Madohi, Postu Administrativu Dom Aleixo. Kazu ne’e kontaktu-besik iha uma-laran husi cluster BTN II ne’ebé deteta iha loron 7 fulan Marsu. Ninia teste primeiru negativu, hafoin halo tiha kuarentena, positivu iha segundu teste, horiseik.
b). Kazu pozitivu 1, husi Aldeia 05, Suku Fatuhada, Postu Administrativu Dom Aleixo. Positivu ida ne’e kontaktu-besik ho kazu konfirmadu husi Cluster SEFOPE. Kazu ida ne’e profisionál saúde ida iha HNGV, unidade hemodiálize. Nia hahú iha sintomas lijeirus iha loron 11 marsu, hafoin iha loron 15 marsu halo teste, no hatudu positivu.
c). Kazu positivu 2, husi Aldeia 20 de Setembro, Suku Bebonuk, Postu Administrativu Dom Aleixo. Positivu hirak ne’e iha kontaktu-besik ho kazu 2 positivu iha cluster hanesan. Husi mós positivu nain rua ne’e mak hamosu cluster ida iha Baucau, Wailili, ne’ebé anunsía loron rua liu-bá.
d). Kazu positivu 1, husi Aldeia Avansa, Suku Bairro Pite, Postu Administrativu Dom Aleixo. Positivu ida ne’e kontaktu besik husi kazu positivu iha cluster Aldeia 4 de Setembru, ne’ebé hetan da’et husi nia la’en ne’ebé servisu iha MTC.
Ho nune’e, kazu detetadu ka positivu iha munisipiu Dili nian husi loron 7 fulan-marsu to’o ohin loron 16 fulan-marsu, hamutuk hotu 77. Ho baze ba informasaun foun ne’ebé ekipa konjunta saúde nian rekolle, foku/cluster kazu positivu iha Dili fahe ba cluster 23, namkari iha instituisaun 3, eventu 1 no Suku 7 iha Postu Administrativu D. Aleixo, no mós Postu Administrativu Vera Cruz.
SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
a) Uza máskara
b) Fase liman bebeik ho sabaun ka dezinfetante ruma
c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
d) Evita halibur malu barak
e) Hamri’ik ka tur dook husi ema seluk, mínimu metru ida ho balu.
