Kordenadór Forsa Tarefa ba Prevensaun no Mitigasaun Surtu Covid -19 iha Timor-Leste, Rui Maria de Araujo informa katak, kazu foun na’in 7 ne’e iha mane na’in 5 no feto na’in 2 ho idade tinan 14 mai to’o idade 43 no sira la hatudu sintomas.
Husi loron 1 fulan janeiru to’o 14 fulan marsu total kazu detetadu positivu iha 143, husi numeru ne’e 54% feto no sira nia idade avaria entre 22 to’o tinan 44.
“Husi 143 ne’ebé ita halo diagnostiku hahú husi fulan-janeiru mai to’o fulan-marsu 38% ne’e diagnostikadu iha kuarentena nia laran, 72% iha diagnostika iha komunidade ka laos iha kuarentena nia laran. Enkuantu 67% diagnostika iha Dili, 24% iha Covalima, 8% iha Baucau no 1% iha Vikeke,”dehan Dr. Rui, segunda ohin (15/3), iha sala SIJK, CCD Dili.
Evolusaun surtu Covid-19 iha Dili, husi total kazu foun na’in 7 ne’e, sira na’in 5 iha Munisipiu Dili, hanesan kazu positivu ida iha kuarentena Carla Mention, ne’ebé halo viajem mai husi indonezia. Kazu positivu ida iha aldeia Hura, Suku Motael, Postu Administrativu Vera Cruz, positivu ida ne’e kontaktu besik ho kazu konfirmadu ida husi Cluster aldeia 4 de setembru, ne’ebé mós hetan transmisaun husi nia laen husi Cluster Ministériu Transporte Komunikasaun.
Entretantu kazu positivu ida husi aldeia Tera Santa, kazu ida ne’e husi rastreiu alietoriu.
Kazu postivu ida husi aldeia fomentu 3, positivu ida ne’e kontaktu besik ho kazu konfirmadu ida husi Cluster aldeia fomentu 3.
No kazu positivu ida ikus husi Munisipiu Dili husi aldeia 5 de Outubru, Suku Bairu-Pite, positivu ida ne’e deteta husi amostra vijilansia sentinela iha HNGV.
Ho nune’e kazu detetadu ka positivu iha Munisipiu Dili nian husi loron 7 to’o 15 fulan-marsu hamutuk 72.
Dr. Rui subliña tan katak, ekipa konjunta rekolla foku ba Cluster kazu postivu iha Dili ne’ebé hetan revizaun hanesan, kazu detetadu 72 iha Munisipiu Dili ne’e fahe ba Cluster 2, iha instituisaun 3, suku 7 no postu administrativu 3.
No kazu 2 seluk husi Munisipiu Vikeke, na’in 1 husi aldeia uma-anaiku, Ossu desima, Postu Administrativu Ossu.
No ida seluk husi aldeia Afaloikai, Postu Administrativu Uatulari.
Sira na’in rua ne’e mai husi Munisipiu Dili, ida primeiru sai husi Dili iha loron 12 fulan-marsu no autoriza husi SIJK atu ba hakoi mate.
Ida segundu sai husi Dili iha loron 8 fulan-marsu, ekipa saude hala’o ona atividade buka tuir kontaktu besik husi kazu positivu na’in rua ne’e.
“Total kazu foun Covid-19 hamutuk na’in 7, rekuperadu na’in 5 no atual baixa iha sala izolamentu Vera Crus hamutuk na’in 99,”dehan Dr. Rui liu husi zoom call.
Relasiona ho kazu Covid-19 aumenta bebeik, Governu liu husi Konsellu Ministru (KM), segunda ohin deside prolonga tan serka sanitaria no konfinamentu obrigatóriu iha kapital Dili to’o oras 23:59 loron 2 fulan abril tinan 2021.
Enkuantu Konsellu Ministru mós deside aplika serka sanitaria no konfinamentu obrigatóriu ne’e iha Munisipiu rua hanesan, Munisipiu Baucau no Vikeke to’o loron 29 fulan-marsu.
SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
- e) Hamri’ik ka tur dook husi ema seluk, mínimu metru ida ho balu.
