Tuir Ministru Prezindensia  Konsellu Ministru, Fidelis Leite Magalhãens hatete, ba munisipiu rua Baucau no Vikeke  sei aplika serka sanitaria ou konfinamentu obrigatoriu, ne’ebé bandu sirkulasaun ema entre munisipiu ne’e rasik no to’o ba administrativu sira seluk.

Exetu iha kazu ho fundamentu ne’ebé forte ho razaun seguransa públika, saúde públika, asistensia umanitaria, manutensaun sistema abastamentu públiku ba interese públiku nian.

“Regra aplikasaun serka sanitaria no konfinamentu nian iha munisipiu rua ne’e mak hanesan, sidadaun hotu tenki hela iha uma, bainhira sai enkuantu iha nesesidade urjensia hanesan, ba sosa hahan, sosa pulsa ahi, pulsa internet no hola nesesidade baziku sira, no mós servisu sira ne’ebé esensial,”dehan nia iha salaun Ministeriu Finansas (15/3).

Nune’e regras ne’ebé presiza atu halo tuir nafatin mak hanesan, fase lima bebeik, uza maskara, labele halibur malu, distansiamentu sosial kuaze metro 1.5 no labele sai bainhira la nesesariu.

Segundu sidadade Munisipiu Baukau afeitadu ona ho moras Covid-19 hamutuk ema na'in 6. Entre na'in 6 ne'e, na'in 4 pesoal profesional saude iha sentru saude Wailili, na'in ida nudar estaziaria medisina iha Hospital Referal Eduardo Ximenes (HOREX) no na'in ida husi eskola ICS husi Dili ne'ebe halo viazen ba Kaibada, Baukau.