Ermelinda Rego hateten, situasaun Covid-19 ne’ebé halo estadu taka dalan no haruka ita hela deit iha uma ne’e ita bele mate hamlaha tanba tuir lolos ami sira ne’ebé buka hela servisu partikular par hodi sustenta deit moris ne’e susar tebes tanba serka sanitária ne’ebé halo ita labele bók án ne’e.

Agora dadaun ami hahan mós laiha tamba situasaun aperta metin ne’e atu la’o halo nusa, ha’u faluk tan ne’ebé kuandu sitausaun hanesan ne’e ami susar tebes.  durante loron 4 ona ami laiha fós atu tein tamba situasaun halo ami labele sai ba buka servisu partikular ruma hodi bele sosa netik fos ruma hodi tein ba ami han. Dehan Ermelinda ba Jornalista Jornal Independente iha laletek Bedois, (13/03).

Faluk Ermelinda Rego ne’ebé hela hamutuk ho nia oan na’in 6 no Bebé nain 2 hamutuk nain 8 ne’e sente susar tebes tamba situasaun ida ne’e labele halo sira movimenta hodi buka netik moris atu bele sustenta familia sira. Ha’u nia oan no mane foun sira mos laiha servisu entaun ami atu halo oinsa, tamba loron 4 ona ami fos laiha ha’u tauk los ba ha’u nia bei-oan nain rua ne’e entaun hodikalan ha’u konsege telefone ba ha’u nia responsavel igreja nian iha ami nia Bairro Bedois sr. Francisco Maria ho tan Xefe  Aldeia par bele tulun netik ami durante situasaun serka Sanitária ne’e. Dehan Faluk ne’e.

Horikalan kuaze oras tuku 10:00 ona hanesan ne’e mak ha’u nia responsavel sira lori netik fós saku ida mai agora dadauk iha hela ne’e par ami bele aguenta hodi hein situasaun ne’e bainhira mak governu atu loke par ami bele la’o buka netik servisu ruma par bele sustenta netik ami nia án. Ha’u hakarak aproveita ha’u nia situasaun ida ne’e hodi husu ba Governu atu tau matan netik ba ami faluk sira ne’e nune’e. La’os ha’u deit maibé ha’u fiar katak ha’unia feto maluk sira ne’ebé dadauk ne’e faliuk hanesan ho ha’u ne’e, ami infrenta situasaun hanesan.

Imi hanoin to’ok, se situasaun ida ne’e mak kontinua, oinsa ho ami sira ne’e tanba ne’e ha’u husu ba Governu ida ne’e atu tau matan netik ba ami. Ami la husu buat osan ba governu maibé fahe netik fós ruma mai ami par ami bele aguenta selae “la’os COVID-19 mak oho ita maibé Hamlaha mak oho ita neneik”.