Ministru Juventude, Desportu, Arte, no Kultura, Nelyo Isaac Sarmento hatete, ohin atleta Ema ho Defisiensia tilun na’in-3 mai aprezenta katak, sira sei partisipa iha jogu olímpiku ba dala-25 iha Japaun.

Tanba ne'e, governu apoiu tomak ba esforsu  joven ho defisiénsia hirak ne’e, atu ekoraza sira iha pasu kiik sira-ne'e.

“Ha'u iha serteza katak ita-boot sira bele gaña esperensia ruma no fila-fali mai Timor hodi fahe ita boot sira nia esperiénsia sira  ho kolega sira-ne'ebé maka seidauk hetan oportunidade,” Dehan Ministru Nelyo, iha salaun MJDAK, Segunda (10/11).

Governante ne'e mos,  enkoraja atleta sira atu la’ós de’it foku ba badminton, maibé mós dezenvolve sira potensiál iha desportu sira seluk hanesan, tenis meza no atletismu.

Tuir nia, partisipasaun ida ne’e bele hametin relasaun amizade entre Timor-Leste ho nasaun Asia liu husi desportu inkluzivu.

Iha fatin hanesan, atleta Ivónia Fátima Faria Guterres, hato’o agradese ba apoiu ne’ebé governu liu husi Ministériu Juventude desportu arte no Kultura.

"Ami agradese tebes ba laran luak hosi MJDAC, Maski ho fundu limitadu, sira ajuda ona fasilita ami-nia viajen, Ida-ne'e maka primeira vez ami hetan apoiu diretu hosi ministériu,” Dehan Ivónia.

Nia hatutan, alende de konpete sira mos  sei aproveita oportunidade iha Japaun hodi aprende no fahe sira nia esperiénsia kona-ba mundu desportu ba Ema ho Defisiénsia Tilun, ho esperansa bele fahe esperiénsia hirak ne’e ho komunidade lokál.

Atleta ne'e haktuir, Timor-Leste nia partisipasaun marka pasu importante ida iha luta ba igualdade no rekoñesimentu ba atleta sira ho defisiénsia iha nível internasionál, enkuantu lori mós esperansa foun ba dezenvolvimentu desportu inkluzivu iha Indonézia.

Purtantu, eventu desportu internasionál  ba atleta sira ho Ema ho Defisiénsia tilun nian ne'e  organiza hosi Comité Internasionál Desportu sira-nian, no rekoñese  hanesan kompetisaun multi-desportu daruak tuan liu iha mundu hafoin Jogu Olímpiku sira, eventu ne'e fornese plataforma ida ba atleta sira ho defisiénsia hosi mundu tomak, atu kompete no promove kultura no lian jestuál.

Enkuantu, ekipa ne'e sei sai ba Japaun iha loron 11 fulan-novembru tinan 2025, no fila fali iha loron 28 fulan-novembru tinan 2025.

Entretantu, Atleta na’in tolu kompostu husi Ivónia Fátima Faria Guterres, Abrão Soares da Silva Gusmão, no Domingos Freitas Belo.